An A82 air fosgladh às ùr

Tha an A82, am prìomh rathad air taobh siar na Gàidhealtachd, air fosgladh às ùr an dèidh do mhaoim-slèibhe a dhùnadh Là na Sàbaid, mu chòig mìle deas air a' Ghearasdan.

Bha e dùinte fad còrr is 24 uairean de thìde.

Tha solais eadar-amail air an cur an sàs aig Drochaid Choire Churrachain agus aig Gleann Rìgh.

Chaidh sgrùdadh a dhèanamh gus dearbhadh dè cho mòr 's a bha an call a rinn an droch shìde, 's tha luchd-einsinniridh air dearbhadh gu bheil e a-nis sàbhailte do dhràibhearan.

Sìde

Chaidh an A82 a dhùnadh madainn na Sàbaid an uair a dh'adhbharaich dìle uisge maoimean-slèibhe eadar an Gearasdan agus Baile a' Chaolais.

Bha peinnseanairean a bha a' siubhal air bus am measg mu 50 neach a bh' air an glacadh eadar na maoim-slèibhe airson timcheall air còig uairean de thìde.

Tha grunn rathaidean air dùnadh air an taobh siar o chionn beagan bhliadhnaichean, agus sprùilleach air a thighinn a-nuas orra ann an aimsir fhliuch.