Dithis mhurtairean a' dèanamh ath-thagraidh

Tha an dithis air ath-thagradh a chur a-steach an aghaidh an dìtidh.

Tha dùil gun nochd dithis a fhuaireadh ciontach airson murt an deugaire Liam Aitchison ann an Cùirt nan Ath-Thagraidhean ann an Dùn Èideann Diciadain.

Aig toiseach an Ògmhios an-uiridh, chaidh Ionatan MacFhionghain agus Stefan Millar fhaighinn ciontach den mhurt ann an 2011.

Mìos an dèidh sin, chaidh binn prìosan 18 bliadhna a chur air an dithis.

Ath-thagradh

Tha dùil gun nochd an dithis ann an Cùirt nan Ath-Thagraidhean ann an Dùn Èideann Diciadain, 's iad air ath-thagradh a chur a-steach an aghaidh an dìtidh.

Bha an dithis a' dol às àicheadh nan casaidean gun do mhurt iad Liam nuair a shuidh a' chùis-mhuirt san Àrd-Chùirt ann an Glaschu.

Chuala a' chùirt an-uiridh gun deach 20 lotan sgeine a lorg air corp Liam, agus gun deach a dhochann gu dona mu a cheann.

Chaidh an corp aige a lorg ann an togalach falamh ann an Stèinis, air iomall Steòrnabhaigh ann an Leòdhas.