Stiùidio
Cha chluich seo air an uidheamachd agaibh

Naidheachdan 11:00m

30 An Dàmhair 2014 Ùraichte aig Ùraichte aig

NHS

Thuirt Buidheann Sgrùdaidh na h-Alba gu bheil cùisean a' sìor fhàs doirbh dhan NHS an Alba, leis cho teann 's a tha an t-airgead airson na seirbheis. Thuirt Riaghaltas na h-Alba gu bheil iad a' dèanamh an dìcheall adhartas a thoirt air an NHS, a dh'aindeoin gearradh anns an taic-airgid bho Westminster. Tha an aithisg ag ràdh nach urrainn dha na Bùird Slàinte cumail ris an aon ìre de sheirbheis ma leanas an suidheachadh a th' ann an-dràsda.

Murphy

Dh'innis Jim Murphy gum bi e a' seasamh airson a bhith na cheannard air Pàrtaidh Làbarach na h-Alba. Thuirt Mgr Murphy, ball Thaobh Sear Rinn Friù ann am Pàrlamaid Westminster, agus an Rùnaire Làbarach airson Leasachadh Eadar-Nàiseanta, gu bheil e ag amas air aonachd ann an Alba an dèidh an referendum, agus air aonachd ann am Pàrtaidh Làbarach na h-Alba. Aig an ìre seo, 's e dithis bhall ann am Pàrlamaid na h-Alba, Niall Findlay agus Sarah Boyack, a sheasas na aghaidh.

Gearraidhean

Thàinig rabhadh bho cheannard Highlife Highland, Iain Moireach, a tha a' ruith nan goireasan cur-seachad do Chomhairle na Gàidhealtachd, gum bi leabharlainn, amair-snàimh agus ionadan spòrs a' dùnadh le gearraidhean na Comhairle. Tha a' Chomhairle ag amas air còrr is £60m de ghearraidhean eadar seo agus 2019 agus, mar phàirt dhen sin, thèid mu £2m a ghearradh à buidseat Highlife.

Sochairean

Tha pàipearan air an d' fhuair am BBC sealbh ag ràdh gu bheil Riaghaltas na Rìoghachd Aonaichte a' beachdachadh air aon de na prìomh shochairean sòisealta airson tinneas a ghearradh dhan aon ìre ris an Jobseekers Allowance. An-dràsta, tha daoine air Employment and Support Allowance a' faighinn £30 a bharrachd gach seachdain. Thuirt Roinn na h-Obrach 's nam Peinnsean nach eil na gearraidhean sin ann am poileasaidh an riaghaltais.

Banca Dhail Chluaidh

Tha coltas ann gum faodadh gun tèid Banca Dhail Chluaidh a reic. Thuirt Banca Nàiseanta Astràilia, dham buin Banca Dhail Chluaidh, gu bheil iad airson tarraing a-mach às an Rìoghachd Aonaichte. Tha e coltach gur e gnìomhachas Banca Astràilia ann am Breatainn, an leithid Banca Dhail Chluaidh agus Banca Yorkshire, as coireach gu mòr gu bheil prothaid na buidhne gu lèir a' tuiteam.