Buidheann ùr ga stèidheachadh mu Ospadal an Eilein Sgitheanaich

Image copyright BBC (le cead bho Undiscovered Scotland)

Image caption Tha dragh air muinntir a' chinn a tuath gur ann anns an Ath Leathann a bhios an t-ospadal ùr

Thèid buidheann ùr a stèidheachadh a riochdaicheas daoine ann an ceann a tuath an Eilein Sgitheanaich air a bheil dragh mu chàit' am bi ospadal ùr na sgìre.

'S e an t-Ath Leathann an làrach as fheàrr leis a' bhuidhinn-stiùiridh son prìomh ospadal an Eilein Sgitheanaich 's Loch Aillse, le goireas meidigeach nas lugha ann am Port Rìgh.

Tha dragh air cuid ge-tà mun bhuaidh a bhiodh aig an seo air seirbheisean do mhuinntir a' chinn a tuath.

Tha NHS na Gàidhealtachd a' dol às àicheadh gun do rinn iad co-dhùnadh mu thràth mun làraich agus tha iad ag ràdh gun èist iad ri beachdan an t-sluaigh.

Cumar coinneamh ann am Port Rìgh oidhche Dhiluain far an tèid buidheann a chuir air chois a chuireas beachdan mhuinntir a' chinn a tuath mu choinneamh a' Bhuird Shlàinte.

Bidh a' choinnemh sin ann an Talla Coimhearsnachd Phort Rìgh aig 7.30f Diluain.