Fearg is toileachas mu ospadal ùr

Air fhoillseachadh
Fo-thiotal an deilbh,
Chuir Bòrd Slàinte na Gàidhealtachd taic ri plana 'son ospadal ùr san Ath Leathann is ionad nas lugha am Port Rìgh.

Nochd sgaradh bheachd mu cho-dhùnadh Bòrd Slàinte na Gàidhealtachd gus ospadal ùr dhan Eilean Sgitheanach, Loch Aillse agus Iar-Dheas Rois a stèidheachadh san Ath Leathann.

Dh'aontaich am Bòrd Dimàirt gur e an t-Ath Leathann an làrach as fheàrr airson ospadail ùir le ionad nas lugha ann am Port Rìgh.

Thèid an co-dhùnadh deireannach a dhèanamh a-nise le Rùnaire na Slàinte, Shona Robison.

Tha luchd-iomairt ann an ceann a tuath an Eilein Sgitheanaich feargach mun ghnothach is tha iad a' gealltainn nach eil an t-strì seachad.

Tha iad ag ràdh gu bheil a' mhòr-chuid den t-sluagh a' fuireach ann an meadhan is ceann a tuath an eilein agus gur ann am Port Rìgh a bu chòir prìomh ionad slàinte na sgìre a bhith.

Dragh mòr

Nochd iad dragh mòr cuideachd gun tèid leapannan a chall aig Ospadal Phort Rìgh, is iad ag ràdh gur e dùnadh an ospadail a tha sin cha-mhòr.

Dh'fhàg iad cuideachd air a' Bhòrd Shlàinte nach robh an co-chomhairleachadh poblach aca ceart no cothromach.

"Tha daoine a' faireachdainn gun robh iad air an gearradh a-mach às a h-uile càil air sgàth gun tàinig an t-Ath Leathann anns a' chiad àite an toiseach. Bha iad a' faireachdainn gun robh a h-uile càil air a chur ann an àite mar-thà agus nach robh na beachdan aca luachmhor idir", thuirt fear den luchd-iomairt, Niall Fearghasdan.

"Tha Pàrlamaid na h-Alba ag iarraidh a bhith air a ceangal ris na coimhearsnachdan a-muigh anns na sgìrean mar na coimhearsnachdan againn fhìn.

"Mar sin, an uair a chì thu daoine anns a' choimhearsnachd a' tighinn thugad agus duilgheadasan mòra aca gu bheil iad air an gearradh a-mach às a h-uile càil dheth seo, feumaidh daoine a bhith ag èisteachd", thuirt e.

Sgrìobhaidh an luchd-iomairt a-nis gu Shona Robison.

Taic

Thuirt NHS na Gàidhealtachd gun do rinn iad co-chomhairleachadh san dòigh cheart is gun robh a' mhòr-chuid a thug seachad am beachd a' cur taic ri ospadal ùr san Ath Leathann.

Cho-dhùin Comhairle Slàinte na h-Alba cuideachd gun deach an co-chomhairleachadh a dhèanamh a rèir nan riaghailtean a th' ann.

Thuirt am Bòrd gum bi cùram coimhearsnachd nas fheàrr ann air a' cheann thall.

Sa cheann a deas den eilean agus air Tìr Mòr, chaidh fàilte a chur air a' cho-dhùnadh.

"Tha sinn air a bhith ag obair air tighinn chun na h-ìre a tha seo bho chionn cha-mhòr dà bhliadhna a-niste", thuirt an Comh. Hamish Friseal.

"Deasbad is co-dhùnaidhean"

"Tha sinn air mòran rannsachaidh a dhèanamh is mòran obair, deasbad agus co-dhùnaidhean a dhèanamh airson an là seo a chur air bhog", thuirt e.

Dh'iarr Mgr Friseal a-nise air sluagh na sgìre a' tighinn còmhla gus seirbheisean slàinte fhaighinn aig an ìre as àirde a ghabhas.

"Sin an dòigh air adhart - chan eil teagamh an sin.

"Tha uinneag againn an seo a dh'fhaodadh sinn a chur gu feum airson seirbheisean fhaighinn.

"Mura dèan sinn feum den sin - ge bith dè an t-adhbhar - tha e gu math soilleir dhomhsa gu bheil e a' cur dragh air iomadach duine nach fhaigh an adhbhar a tha seo a-rithist airson iomadach bliadhna", thuirt e.

Tuilleadh air an sgeulachd seo

Ceanglaichean Eadar-lìn Dàimheil

Chan eil am BBC an urra ri na tha air Làraichean-lìn air an taobh a-muigh