Cumhachdan fearainn gan iarraidh

Bùth
Image caption Tha seann togalach B&Q an Inbhir Nis a-nise ann an staid ropach.

Thuirt comhairliche ann an Inbhir Nis gum bu chòir laghan ùra fearainn a tha san amharc a chleachdadh gus togalach coimearsalta sa bhaile a cheannach agus a chur gu feum.

Tha Riaghaltas na h-Alba dìreach air co-chomhairleachadh a mhaireas 10 seachdainnean a chur air dòigh air na molaidhan aca 'son ath-leasachadh an fhearainn.

Am measg tha iad a' cur air adhart, tha gum biodh cumhachd aig an Riaghaltas a dhol an sàs agus a thoirt air uachdaran fearann a reic mura h-eil iad ag obair gu maith an t-sluaigh.

Tha fear de chomhairlichean Meadhan Inbhir Nis, Ridseard Laird, ag ràdh gum bu chòir cumhachdan den leithid a chleachdadh gus toirt air an fheadhainn leis a bheil seann togalach B&Q air Rathad Telford sa bhaile a reic.

Bàn

Bha an togalach bàn bho ghluais B&Q gu Pàirce Ghnìomhachais an Longman bho chionn grunn bhliadhnaichean.

Tha mòran dhaoine air gearain mu staid an togalaich.

Thathas a' meòrachadh an-dràsta air planaichean gus leasachadh mòr a dhèanamh air an sgìre timcheall air a' Chanàl Chailleanach is chaidh an togalach a chomharrachadh mar ghoireas a dh'fhaodar a chur gu feum.

Mar phàirt de na planaichean, gheall Comhairle na Gàidhealtachd is Canàlaichean na h-Alba coimhead ri mar a ghabhadh togalaichean den leithid a cheannach.

Dh'fhaodadh gum bi an cothrom sin a-nise ann, a rèir Mhgr Laird.

"Tha mi den bheachd, mura h-eil an fheadhainn leis a bheil an togalach airson a chur gu feum, gum bu chòir do Riaghaltas na h-Alba cumhachdan a thoirt do chomhairlean toirt orra sin a dhèanamh.

Feuchainn

"Tha Comhairle na Gàidhealtachd air feuchainn grunn thursan ri toirt air an fheadhainn leis a bheil seann togalach B&Q a chur gu feum ach cha do shoirbhich leinn.

"Tha an làrach seo ro chudromach dìreach a bhith na laighe dad nas fhaide gun sian air a dhèanamh leatha", thuirt e.

Mhol Mgr Laird nam biodh sgeama pileat ann le cumhachdan a bharrachd den t-seòrsa seo do dh'ùghdarrasan ionadail gum bu chòir Comhairle na Gàidhealtachd fhèin a chleachdadh.

Thuirt e gu bheil an làrach air Rathad Telford am measg ghrunnan ann an Inbhir Nis agus air a' Ghàidhealtachd far am b' urrainn dhan Chomhairle na cumhachdan a chur gu feum.

Tuilleadh air an sgeulachd seo

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile