Lùghdachadh air seirbheisean slàinte Uibhist?
- Air fhoillseachadh
Tha dragh air muinntir Uibhist mu atharrachaidhean ann an seirbheisean slàinte na sgìre.
Tha Bòrd Slàinte nan Eilean Siar a' beachdachadh air na h-ionadan fiaclaireachd ann an Loch Baghasdail, Loch nam Madadh agus Lionacleit a dhùnadh agus aon ionad a stèidheachadh aig Ospadal Uibhist 's Bharraigh ann am Baile Mhanaich.
Dh'fhàgadh sin ge-tà, gum feumadh daoine ann an Èirisgeigh agus ann am Beàrnaraigh siubhal mu 60 mìle airson faighinn chun an fhiaclair agus air ais dhachaigh a-rithist.
Tha am Bòrd Slàinte a' dèanamh dheth gum biodh e na b' fhasa luchd-obrach fhastadh agus a chumail, agus na bu shaoire, aon ionad fiaclaireachd a bhith ann.
Tha an Comh. Uibhisteach Raghnall MacFhionghain ag ràdh nach deach smaoineachadh ge-tà mun chosgais a thig air na h-euslaintich, gu h-àraidh ma dh'fheumas iad tacsaidh fhaighinn.
Leapannan ospadail
Tha dragh ann cuideachd gun deach lùghdachadh a thoirt air an àireamh leapannan ann an Ospadal Uibhist 's Bharraigh.
Dh'fhosgail an t-ospadal ann an 2001, le 29 leapannan.
A-nis ge-tà, tha sin air a ghearradh gu 15 - ged a thèid aca air 20 euslainteach a ghabhail ma bhios sin a dhìth.
Tha am Bòrd Slàinte ag ràdh ge-tà, nach tig ìsleachadh air an àireamh nursaichean a tha ag obair anns an ospadal.