Gearradh air seirbheisean lannsaireachd ann an Gallaibh

Inbhir Ùige Image copyright BBC (le cead bho Undiscovered Scotland)
Image caption Tha trioblaid air a bhith aig Bòrd Slàinte na Gàidhealtachd na tha a dhìth orra de luchd-obrach fhastadh ann an Gallaibh.

Tha Bòrd Slàinte na Gàidhealtachd ag ràdh nach bi e comasach dhaibh tuilleadh seirbheisean lannsaireachd a thoirt seachad ann an Ospadal Ghallaibh ceithir uairean fichead san là air sgàth gainnead luchd-obrach.

Tha trioblaid aig a' Bhòrd Slàinte na dh'fheumas iad de luchd-obrach slàinte fhastadh, gu h-àraidh ann an ospadalan beaga.

Tha iad ag ràdh gu bheil iad a' feuchainn ri fuasgladh a lorg, ach nach e a bhith a' fastadh lannsairean locum freagairt na cùise.

Chan eil air fhàgail ann an Ospadal Ghallaibh a-nis ach aon lannsair, às dèidh do dh'aonan eile a dhreuchd a leigeil dheth, agus fear eile a dhreuchd fhàgail.

Lùghdachadh

Bho seo a-mach cha tèid obair-lannsa èiginneach air adhart anns an ospadal air an oidhche neo air an deireadh-sheachdain.

Fàgaidh seo gum feumar cuid de dh'euslaintich a thoirt gu Ospadal an Ràthaig Mhòir ann an Inbhir Nis ann an suidheachaidhean èiginneach.

Tha ceannardan a' Bhùird Shlàinte ag ràdh ge-tà, nach ann ag amas air cur às de sheirbheisean lannsaireachd ann an Ospadal Ghallaibh a tha iad leis a' ghluasad seo.

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile