Trioblaidean ùra leis an dealan

Stoirm
Image caption Tha an t-sìde air socrachadh gu mòr ach tha trioblaidean a' leantainn.

Dh'innis a' chompanaidh SSE gu bheil na mìlltean de dhaoine fhathast as aonais an dealain.

Bha aig aon àm timcheall air 31,000 dachaidh gun chumhachd Diciadain.

Ged a chaidh dealan a thilleadh dhan mhòr-chuid dhuibh sin, tha trioblaidean ùra air bualadh air an lìonra is coltas ann gur e dealanach an Cille Chuimein mu 09.00m a bu choireach.

Aig an ìre seo, tha 27,000 dachaidh gun dealan anns na h-Eileanan Siar, san Eilean Sgitheanach, am Muile, Ìle is sgire an Òbain, Àird nam Murchan, Àird Fheàrna, Tom Aitinn agus Eilginn.

Tha SSE an dòchas gun tèid aca air cùisean a chur ceart ro mheadhan-là, ged a tha iad a' toirt rabhadh gu bheil dealanaich agus neart na gaoithe a' cur maill air luchd-einnsiniridh.

Sgoiltean

Tha cha mhòr gach sgoil anns na h-Eileanan an Iar fosgailte Diardaoin ach a-mhàin Sgoil Bhàgh a' Chaisteil.

Tha fhathast na h-uimhir de sgoiltean air a' Ghàidhealtachd dùinte agus gheibhear am fiosrachadh às ùr an seo

Chaidh Sgoil-àraich Ghàidhlig Shlèite a dhùnadh cuideachd.

Tha an aimsir fhathast a' toirt buaidh air seirbheisean aiseig a' chost an Iar.

Ath-sgrùdaidhean

Thuirt Caledonian Mac a' Bhriuthainn gun dèan iad ath-sgrùdaidhean tron là agus gur dòcha gun seòl cuid de na h-aiseagan a tha nan tàmh ma shocraicheas a' ghaoth.

Gheibhear am fiosrachadh às ùr bho Chal Mac fhèin.

Tha drochaid an Eilein Sgitheanaich dùinte do charabadan àrda.

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile