Ceathrar air an goirteachadh an Àird nan Saor

Àird nan Saor
Image caption Thachair an tubaist beagan ro 0920 Diluain

Chaidh ceathrar a bha a' coiseachd air an rathad eadar baile Àird nan Saor agus Gearasdan Deòrsa a ghoirteachadh às dèidh do chàr bualadh annta madainn Dhiluain.

Chaidh duine a sgèith dhan ospadal ann an Inbhir Nis às dèidh na tubaiste a thachair mu 09:20m, agus chaidh an triùir eile a thoirt ann le carbadan-eiridinn.

Chan eil duine aca ann an cunnart am beatha.

Dhearbh Poilis na h-Alba gu robh an luchd-coiseachd agus dràibhear a' chàir uile nam buill de na feachdan armaichte.

Thuirt iad gur e tubaist a bha seo ge-tà, agus nach e ionnsaigh cheannairc a bh' ann.

Thathas ag iarraidh air daoine aig a bheil fiosrachadh mun tubaist fònadh thuca air an àireamh-fòn 101.