BBC Naidheachdan

CNES airson dà aiseag a ghlèidheadh

Published
image captionTòisichidh deuchainnean aig cidhe Steòrnabhaigh Dimàirt.

Tha Comhairle nan Eilean Siar airson 's gum fuirich an Isle of Lewis air slighe Steòrnabhaigh seachad air mìosan an t-Samhraidh.

Tòisichidh deuchainnean cidhe aig caladh Steòrnabhaigh Dimàirt 's an obair-leasachaidh aig a' phort a-nis air a crìochnachadh.

Thuirt Riaghaltas na h-Alba gu bheil iad a-nis an dùil gum bi an aiseag ùr, an MV Loch Seaforth, a' tòiseachadh air an t-slighe ro dheireadh na mìos.

Dàil

Choinnich Ministear na Còmhdhail, Derek MacAoidh ri riochdairean bho Chomhairle nan Eilean Siar 's e air turas ann an Steòrnabhagh Diluain.

Tha tòrr mì-thoileachais air a bhith ann mu shuidheachadh an Loch Seaforth 's i grunn mhìosan air dheireadh.

Tha dùil ri tuilleadh troimhe-chèile as t-Earrach nuair a dh'fhàgas obair air alt-aiseig Ulapul gum feum daoine a dh'iarradh carbadan a thoirt leotha an slighe a dhèanamh tron Eilean Sgitheanach.

Gheall Mgr MacAoidh gun dèanadh an Riaghaltas an dìcheall buaidh na h-obrach sin a lùghdachadh.

Tha dòchas ann a-nis gun gabh an obair sin a dhèanamh ann an ceithir seachdainnean, seach sia mar a bha dùil an toiseach.

MV Isle of Lewis

Chaidh gealltainn roimhe gum fuiricheadh an Isle of Lewis air an t-slighe, còmhla ris an Loch Seaforth, thar mhìosan an t-Samhraidh nuair a bhios barrachd dhaoine a' siubhail.

Tha Comhairle nan Eilean Siar airson 's gum fuirich i nas fhaide na sin 's iad a' dèanamh dheth gur e dà bhàt-aiseig a b' fheàrr a fhreagradh air an t-slighe.

Thuirt Cathraiche Còmhdhail na Comhairle, Iain MacAoidh, gum biodh iadsan a' strì airson an dà bhàt-aiseig a ghlèidheadh.

"'S e seo a bha sinne ag iarraidh, mar Chomhairle, bho chionn fhada - dà bhàta a bhith a' dol tarsaing a' Chuain Sgith agus tha sinn an dòchas gur e seo toiseach-tòiseachaidh," thuirt e.

Tuilleadh air an sgeulachd seo

  • An MV Loch Seaforth air fàire

Ceanglaichean Eadar-lìn Dàimheil

Chan eil am BBC an urra ri na tha air Làraichean-lìn air an taobh a-muigh