An Cupa Ceilteach an Taigh an Uillt
Image copyright
SNS
Bidh a' chuairt dheireannach de Chupa Chomann Ceilteach Ghlaschu am-bliadhna an Taigh an Uillt.
Ged a bha an geama gu traidiseanta ann an Glaschu fhèin, tha an Cupa Ceilteach air a chluich ann an Inbhir Aora agus Srath Chura anns na beagan bhliadhnaichean a chaidh seachad.
Thill a' chuairt dheireannach a Ghlaschu an 2014 leis gun robh na h-uimhir a' dol sa bhaile a thaobh spòrs aig an àm.
Tha an Comann Ceilteach air dearbhadh gur ann an Earra-Ghàidheal a bhios an geama am-bliadhna is gun tèid e air adhart an Taigh an Uillt 'son a' chiad turais.
'S ann Disathairne an 27mh den Òg-Mhìos a bhios an geama ann.
Dh'innis an Comann Ceilteach cuideachd gun cuir a' chompanaidh Gregor Cameron Consultancy taic-airgid ris an fharpais.
Bhuannaich Caol Bhòid an fharpais an 2014 is iad air an gnothach a dhèanamh air Inbhir Aora 6-2 sa chuairt dheireannaich.
Dh'fhaodadh na sgiobaidhean coinneachadh a-rithist san iar-chuairt dheireannaich am-bliadhna.
Tha an taghadh air fad mar a leanas;
A' Chiad Chuairt
Celtic an Òbain - Cille Mhoire
Srath Chura - Baile a' Chaolais
Gleann Urchaidh - Eilean Bhòid
Taigh an Uillt - Obar Dobhair
An dàrna chuairt
Srath Chura / Baile a' Chaolais - Celtic an Òbain / Cille Mhoire
Taigh an Uillt / Obar Dobhair - Inbhir Aora
Gleann Urchaidh / Eilean Bhòid - Camanachd an Òbain
Glaschu Meadhan Earra-Ghàidheal - Caol Bhòid
An Iar-Chuairt Dheireannach
Gleann Urchaidh / Eilean Bhòid / Camanachd an Òbain - Srath Chura / Baile a' Chaolais / Celtic an Òbain / Cille Mhoire
Taigh an Uillt / Obar Dobhair / Inbhir Aora - Glaschu Meadhan Earra-Ghàidheal / Caol Bhòid