Stiùidio
Cha chluich seo air an uidheamachd agaibh

Naidheachdan 11:00m

18 An Gearran 2015 Ùraichte aig Ùraichte aig

Cion-cosnaidh

Thuit an àireamh a bha gun chosnadh ann an Alba air na trì mìosan mu dheireadh an-uiridh mu 15,000 gu beagan nas lugha na 150,000. Thuit an àireamh a bha gun obair air feadh Bhreatainn eadar an Damhair agus an Dùbhlachd dhan ìre as lugha ann an sia bliadhna, gu 1,860,000.

HSBC

Rinn luchd-casaid anns an Eilbheis rèad air oifisean banca prìobhaideach HSBC ann an Geneva, 's iad a' rannsachadh chasaidean gu bheil am banca a' falach airgid do dhaoine a tha a' seachnadh chìsean. Thuirt am banca gun do dhùin iad cunntasan banca nach eil a' tighinn a rèir nan riaghailtean agus inbhe ris am biodh dùil aig HSBC.

Companaidhean Cumhachd

Tha aithisg ùr ag ràdh gu bheil na sia companaidhean cumhachd mòra a' cur phrìsean nas motha air luchd-cleachdaidh a tha dìleas dhaibh, seach feadhainn a bhios a' gluasad bho chompanaidh gu companaidh airson cùmhnant nas saoire. Tha an aithisg bho Ùghdarras na Farpais agus Margaidh ag ràdh gu bheil mòran a' call faisg air £250 gach bliadhna leis nach eil iad a' faighinn cùmhnant nas fheàrr le bhith ag atharrachadh na companaidh a tha a' reic dealain no gas riutha.

Co-bhanntachd

Thuirt am Prìomhaire Dàibhidh Camshron gur e adhbhar dragh a bhiodh ann an co-bhanntachd eadar an SNP agus na Làbaraich mura biodh mòr-chuid aig taobh seach taobh anns an taghadh choitcheann anns a' Chèitean. Thuirt Mgr Camshron gum biodh sin a' ciallachadh riaghaltas anns am biodh feadhainn a tha ag iarraidh an Rìoghachd Aonaichte a bhriseadh às a chèile.

Soitheach air na Creagan

Nì bàta-slaodaidh cobhair air bàta cargo a chaidh air tìr ann an Àird nam Murchan. Chaidh an Lysblink Seaways, anns a bheil mu 400 troigh de dh'fhaid air tìr faisg air Cille Chòmhghain mu 02:00m an-diugh ann an droch shìde. Cha deach duine a ghoirteachadh, agus tha e coltach nach eil an soitheach ann an cunnart mòr sam bith. Thèid feuchainn ri a cur air bhog a-rithist le muir-làn.

Seirbheisean Chal Mac

'S tha droch shìde a' cur maill air seirbheisean aiseig Chaledonian Mhic a' Bhriuthainn. Cha bhi seòladh idir an-diugh eadar Ùige, an Tairbeart agus Loch nam Madadh, agus cha bhi seirbheis nas motha eadar an t-Òban, Bàgh a' Chaisteil agus Loch Baghasdail an-diugh. Bha aiseag Chaolas Bharraigh na tàmh anns a' mhadainn agus iad a' toirt sùil air an t-suidheachadh an sin an-dràsta fhèin. Tha Cal Mac ag ràdh gu bheil coltas ann gun cuir neart na gaoithe maill air neo stad uile gu lèir air na h-uimhir de na seirbheisean eile feasgar.