Loch Seaforth ga càradh

MV Isle of Lewis
Image caption Tha an Loch Seaforth a' gabhail àite an Isle of Lewis air slighe Steòrnabhaigh.

B' fheudar do Chaledonian Mac a' Bhriuthainn an MV Isle of Lewis a ghairm a-steach an àite a' bhàt-aiseig ùir aca, MV Loch Seaforth, oidhche Ardaoin, agus fan air briseadh ann an tè de na h-einnseannan aice.

Chaidh an trioblaid a chur ceart an dèidh còig uairean de thìde, agus sheòl i à Ulapul mu mheadhan oidhche.

Chan eil ach trì seachdainnean bho sheòl an Loch Seaforth air a' chiad turas le luchd-siubhail eadar Steòrnabhagh agus Ulapul.

Tha dùil gum bi an Isle of Lewis ann an seirbheis cuide ris an Loch Seaforth tron t-Samhradh, mus tèid i fhèin a thoirt far na slighe air a bheil i air a bhith bho 1995.

Thuirt labhraiche do Chal Mac: "Feasgar an-dè dh'èirich trioblaid le fan ann an seòmar einnseinn a bha feumach air càradh, agus chaidh co-dhùnadh an soitheach a thoirt far na slighe fhad 's a dheadh seo a dhèanamh.

"Chaidh an MV Isle of Lewis a chur air na h-àite airson an t-seirbheis a chumail a' dol.

"Ged a chaidh maill air luchd-siubhail ri linn seo, agus ged a tha sinn duilich airson seo, cha deach duine fhàgail gun siubhail.

"Cha b' e trioblaid mhòr a bha seo, ach bha mu chòig uairean de thìde a dhìth airson a cur ceart ri linn cho doirbh 's a bha an t-àite a ruighinn. Bha an obair-càraidh deiseil ro 11:00f, agus sheòl i às Ulapul mu uair de thìde às dèidh sin."