Dealan ga thilleadh do dhachannan

  • 10 Am Màrt 2015
Gleann Comhann Image copyright SAIS Glencoe
Image caption Thug an droch shìde cuideachd sneachda na cois do sgìrean leithid Ghlinne Chomhann, Loch Abar agus a' Mhonaidh Ruaidh.

Tha luchd-einnsinnìridh ag obair gus cumhachd an dealain a thilleadh gu mu 4,100 dachaigh an dèidh droch shìde oidhche Luain.

Bha a' ghaoth aig 90 m.s.u. ann an Uibhist a Deas, 's i cho mòr ri 80 m.s.u. ann an àiteachan eile.

Chaidh carbad-toisich trèana a bha a' siubhail eadar Glaschu is Inbhir Nis taobh Obar Dheathain a mhilleadh nuair a bhuail e ann an craoibh faisg air Baile Chèith mu 7:00f.

Chaidh luchd-siubhail a thoirt air adhart air busaichean. Cha deach duine a ghoirteachadh.

Tha Scotrail cuideachd air rabhadh a thoirt gum bu maill suas gu 1:00f air seirbheisean eadar Inbhir Nis agus Caol Loch Aillse / Inbhir Ùige ri linn "bacadh" air an loidhne eadar Inbhir Nis agus Inbhir Pheofharain.

Thuirt SSE gun robh mu 4,500 dachaigh air a bhith às aonais an dealain. 'S ann an Inbhir Ùige, Cataibh is an t-Eilean Sgitheanach as motha a chaill daoine an dealan.

Thèid luchd-einnsinnìridh a Cholbhasa air bàta gus dealan a thilleadh gu 14 dachaigh san eilean.