Stailc aig HIAL
- Air fhoillseachadh
Dh'aidich Àrd-Stiùiriche Puirt-Adhair na Gàidhealteachd is nan Eilean (HIAL), Inglis Lyon, gum bi e doirbh dhan chompanaidh ma bhios stailc ann le luchd-obrach tèarainteachd an ath-sheachdain, ach gun dèan iad a' chùis.
Bheir an stailc buaidh air 11 phort-adhair: Inbhir Nis, Steòrnabhagh, Barraigh, Tiorodh is Ìle nam measg.
Dh'innis an t-aonadh Prospect, a tha a' riochdachadh cuid de luchd-obrach tèarainteachd HIAL Dihaoine gun robh na buill aca a' dol air stailc, a' tòiseachadh aig meadhan là seachdain Dimàirt.
Tha iad mì-thoilichte mu thuarastal agus mu chùmhnantan-obrach.
Thuirt Stiùiriche HIAL, Inglis Lyon, gum bi an stailc na dùbhlan, ach thuirt e gun tig a' mhòr-chuid de luchd-obrach a dh'obair, is gu bheil manaidsearan air trèanadh fhaighinn gus obair tèarainteachd a dhèanamh.
Tha iad a' creidsinn, thuirt e, gun obraich gnothaichean mar as àbhaist, agus gu bheil teansa ann fhathast gun tèid an stailc a chur dheth.
Thèid an gnothach a thogail aig Holyrood Diluain leis a' BhPA Làbarach airson na Gàidhealtachd, Dàibhidh Stiùbhairt.
Cuiridh e ceist air Ministear na Còmdhail, Derek MacAoidh, a dh'iarraidh gun tèid an gnothach a rèiteach sa bhad.