Stailc aig puirt-adhair na Gàidhealtachd snan Eilean

Tèarainteachd phuirt-adhair Image copyright Thinkstock
Image caption Tha an luchd-obrach tèarainteachd mì-thoilichte mu ìrean-tuarastail agus cùmhnantan-obrach.

Tha luchd-obrach-tèarainteachd aig 11 de phuirt-adhair roinneal na h-Alba air stailc mu phàigheadh agus cùmhnantan obrach.

Thòisich an stailc aig 1200 Dimàirt agus mairidh i 48 uairean a thìde.

Thuirt Puirt-adhair na Gàidhealtachd snan Eilean, a' chompanaidh phoblach leis a bheil na puirt-adhair, gum bi cùisean a' ruith mar is àbhaist, ach a mhàin aig Port-adhair Dhùn Dè a bhios dùinte.

Dh'iarr HIAL air luchd-siubhail a bhith aig na puirt-adhair eadar 15 - 20 mionaid na bu thràithe na'n àbhaist agus gun cus bhagannan a thoirt leotha.

Tha an t-aonadh Prospect a' sireadh àrdachadh pàighidh de 5% dhan luchd-obrach.

Tha iad airson 's gum bi iad air an aon thuarastal 's a tha luchd-obrach Port-adhair Shumburgh ann an Sealtainn, a tha air tuarastal nas àrda.

Thuirt HIAL nach robh àrdachadh de 5% practaigeach agus gu robh tuarastail nas àrda ga thoirt seachad dha luchd-obrach ann an Sealtainn leis gu robh cosgaisean bith-beò agus tuarastail nas àrda ann an sin san fharsaingeachd.

Tha Cathraiche Comataidh Comhdhail Comhairle nan Eilean Siar, Iain MacAoidh, ag ràdh gum faodadh an stailc buaidh a thoirt air eaconamaidh nan eilean.

"Bheir i buaidh air tòrr ghnothachasan agus bheir i buaidh air a' bhòrd shlàinte leis mar a tha iad a' cur euslaintich a dh'Inbhir Nis, a Ghlaschu, a Dhùn Èideann agus gu ospadalan eile," thuirt e.

Thug Prospect rabhadh gu faodadh stailcean eile a bhith air a ghairm mur a tèid a'chùis a rèiteachadh.

Tuilleadh air an sgeulachd seo

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile