Sgafallachd ga cur mu thogalach an teine

'S e fear de na togalaichean as sine ann am meadhan a' bhaile a chaidh na smàl.

Tha sgafallachd ga cur an-àirde mu sheann togalach na h-Acadamaidh Rìoghail ann am meadhan Inbhir Nis, an dèidh mar a rinn teine sgrios air an t-seachdain seo chaidh.

Mhill an teine uachdar an togalaich - a chaidh a thogail san 18mh Linn - oidhche Chiadain seo chaidh.

Tha e air na ballachan a dhèanamh cugallach, agus tha sgafallachd a-niste ga cur an-àirde ris, gus an cumail nan seasamh.

Bha suas ri 50 smàladair an sàs ann a bhith a' mùchadh an teine, agus bha sgiobannan an làthair thar deireadh na seachdaine, ri linn 's gun robh e a' gabhail a-rithist bho àm gu àm.

Cha tèid aca air a dhol am broinn an togalaich fhathast, ri linn dragh mu cho seasmhach 's a tha na ballachan.

Tha an dà chuid Sràid na h-Acadamaidh agus Geata na Bànrighinn fhathast dùinte do charbadan.

Bha dùil gur dòcha gum biodh na sràidean sin fosgailte Diluain, ach tha coltas ann a-niste gum bi iad dùinte beagan làithean fhathast.