Còmhraidhean ùra HIAL

Image copyright Thinkstock

Image caption Tha an t-eus-aonta a' buntainn ri luchd-obrach tèarainteachd.

Tha oidhirp às ùr a' dol Diciadain rèite a ruighinn san eas-aonta eadar Puirt-Adhair na Gàidhealtachd 's nan Eilean agus luchd-obrach tèarainteachd.

Chaidh an luchd-obrach air stailc dà là na bu tràithe air a' mhìos is iad mì-thoilichte le ìrean pàighidh agus modhan-obrach.

Dh'fhàg an stailc gun deach Port-Adhair Dhùn Dè a dhùnadh ach bha puirt-adhair eile na companaidh - Barraigh, Beinn nam Fadhla, Ìle, Inbhir Nis, Steòrnabhagh is Tiriodh nam measg - fosgailte.

Tairgse sgrìobhte

Thill HIAL bhon uair sin le tairgse sgrìobhte ùr air am bi an t-aonadh Prospect a' meòrachadh Diciadain.

Thuirt Stiùiriche HIAL, Inglis Lyon, gun robh e a-riamh nam beachd dèiligeadh ri draghan an luchd-obrach ach thuirt e nach b' urrainn dhaibh sin a dhèanamh fhad 's a bha iad a' maoidheadh a dhol air stailc.

Bha an t-aonadh air rabhadh a thoirt gum faodadh tuilleadh stailcean a bhith ann mura tigeadh rèite.