Fuasgladh air fàire aig HIAL

Tha an t-eas-aonta a' buntainn ri luchd-obrach tèarainteachd.

Tha e coltach gu bheil eas-aonta eadar Puirt-Adhair na Gàidhealtachd 's nan Eilean agus luchd-obrach tèarainteachd gu bhith air a rèiteach.

Chaidh an luchd-obrach air stailc dà là na bu tràithe air a' mhìos is iad mì-thoilichte le ìrean pàighidh agus modhan-obrach.

Dh'fhàg an stailc gun deach Port-Adhair Dhùn Dè a dhùnadh ach bha puirt-adhair eile na companaidh - Barraigh, Beinn nam Fadhla, Ìle, Inbhir Nis, Steòrnabhagh is Tiriodh nam measg - fosgailte.

Chuir HIAL tairgse sgrìobhte ùr dhan aonadh Prospect agus às dèidh chòmhraidhean Diciadain tha an t-aonadh a' moladh gun gabh na buill aca ris.

Aonta

Thuirt iad fon tairgse gum faigheadh an luchd-obrach tèarainteachd an dearbh aonta 's a th' aig luchd-obrach eile a thaobh làithean-saora, tuarastal nuair a tha iad dheth tinn, agus sioftaichean.

Dh'aontaich Prospect an iarrtas 'son àrdachadh pàighidh 5% a chur an dàrna taobh.

Thurt HIAL gu bheil iad toilichte gun robh an dà thaobh air obrachadh còmhla gus aonta a ruighinn.

Thèid na molaidhean a-nise gu bhòt am measg ballrachd an aonaidh is Prospect a' moladh gun tèid taic a chur riutha.