A' cuimhneachadh air Festubert

Eileanaich Image copyright Other
Image caption Na Camshronaich anns anns na trainnseachan ro Bhlàr Festubert, an 16mh agus 17mh den Chèitean, 1915. Taing do dh'Uisdean MacIllinnein son na deilbh.

Cumar tachartasan anns an Eilean Sgitheanach aig an deireadh sheachdainn a' comharrachadh gu bheil ceud bliadhna ann bho Bhlàr Festubert - fear de bhlàir mhòra a' Chiad Chogaidh.

Uile gu lèir bhàsaich faisg air 20,000 duine anns an t-sabaid anns an Fhraing thairis air deich là.

Bha an t-Eilean Sgitheanach, Ceann a' Ghiuthsaich agus a' Mhanachainn am measg nan àitean air an tàinig call 's mòran bhalach òg a bhuineadh dhan na sgìrean sin a chaidh dhan chogadh agus nach do thill.

Chaill an t-Eilean Sgitheanach cha-mhòr 600 duine anns a' Chiad Chogadh.

Bithear a' coimhead gu sònraichte ris a' bhuaidh a thug an call-beatha seo air sgiobannan iomain nan diofar sgìrean.

A' cuimhneachadh

Tòisichidh cùisean Dihaoine le sreath òraidean bho luchd-eachdraidh le cuirm shònraichte air an oidhche a' dèanamh luaidh air cluicheadairean òga iomain a bhàsaich a' sabaid às leth na dùthcha aca.

'S e an craoladair agus eòlaiche iomain Ùisdean MacIllinnein a sgrìobh agus a bhios a' lìbhrigeadh na cuirme.

Leughaidh Somhairle Dòmhnallach dàn a sgrìobh a sheanair, Somhairle MacGill-Eain, a' cuimhneachadh air Blàr Festubert.

Thèid am fonn "Cluba Iomain na Manachainn", a chaidh a sgrìobhadh le fear a bhàsaich ann am Blàr Festubert, a sheinn air pìob mhòir a chaidh fhaighinn air làrach a' bhlàir.

Bithear a' dèanamh air Pàirce nan Laoch Disathairne airson gheamaichean iomain anns am bi sgiobannan an Eilein Sgitheanaich agus Chinn a' Ghiùthsaich a' cluich a chèile.

Bidh seirbheis ann an uair sin madainn na Sàbaid ann an Ceàrnag Shomhairle ann am Port Rìgh.

Tuilleadh air an sgeulachd seo

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile