Na ceudan a' togail fianais am Port Rìgh

Iomairt
Image caption Thog luchd-iomairt am Port Rìgh dragh mu na tha an dàn do sheirbheis na slàinte san sgìre.

Chruinnich na ceudan ann am meadhan Phort Rìgh Disathairne gus fianais a thogail an aghaidh atharrachaidhean ann an seirbheisean slàinte na sgìre.

Tha iad fìor mhì-thoilichte le co-dhùnadh Bhòrd Slàinte na Gàidhealtachd gus ospadal mòr ùr dhan Eilean Sgitheanach, Loch Aillse is Iar Dheas Rois a thogail san Àth Leathann.

Chaidh iomairt a stèidheachadh, SOS NHS Skye, gus strì an aghaidh phlanaichean a' Bhùird-Slàinte is an fheadhainn a tha air a cùlaibh den beachd gun tig lùghdachadh air an t-seirbheis ann an ceann a tuath an eilein rin linn.

Dragh

Tha dragh ann gu sònraichte nach eil leigheas èiginneach 24 uairean ri fhaighinn ann am Port Rìgh an-dràsta agus cuid ag ràdh gu bheil sin a' cur beatha dhaoine an cunnart.

Cha chluich seo air an uidheamachd agaibh
Aithris Chaluim MhicIlleathain air caismeachd Phort Rìgh.

Tha iad ag ràdh gu bheil An t-Àth Leathann ro fhada air falbh do dhaoine a tha ann an èiginn sa cheann a tuath, an dà chuid muinntir an àite agus an àireamh mhòr de luchd-turais a bhios a' tadhal air an sgìre.

Chuala an cruinneachadh ann am Port Rìgh Disathairne beachd gu bheil an sluagh air earbsa a chall ann an NHS na Gàidhealtachd.

Thuirt an luchd-iomairt gu bheil iad a-nise airson coinneachadh ri Rùnaire na Slàinte, Shona Robasdan, gus an cuid draghan a thogail leatha.

"Chan eil sinn a' smaoineachadh gu bheil i a' tuigsinn dè tha a' tachairt", thuirt tè den luchd-iomairt, Màiri NicDhòmhnaill.

"Doirbh"

"Tha i a' faighinn fiosrachadh bho Bhòrd NHS na Gàidhealtachd agus tha e doirbh dhi tuigsinn dè tha a' tachairt. Chan eil i a' fuireach an seo is chan eil i a' faicinn de tha a' tachairt

"Nam biodh ùine aice èisdeachd rinn, dh'innseadh sinn dhi dè tha a' tachairt", thuirt i.

Tha NHS na Gàidhealtachd air dìon a chur air a' cho-dhùnadh aca is thuirt Comhairle Slàinte na h-Alba gur e pròiseas iomchaidh a bh' aca gus an co-dhùnadh a ruighinn.

Tuilleadh air an sgeulachd seo

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile