Coinneamh mu phort-fànais

Image caption Tha Steòrnabhagh agus Machaire Shànais a-measg nan àitean a nochd air gearr-liosta an Riaghaltais

Coinnichidh am ball-pàrlamaid Albannach Gàidhealach Dàibhidh Stiùbhairt ri comhairlichean à Earra-Ghàidheal 's Bòd Diluain 's e dhen bheachd gun gabhadh port-fànais ùr a stèidheachadh ann an co-bhann eadar Machaire Shànais agus Preastabhaig.

Tha Steòrnabhagh, Newquay ann an Sasainn agus Llandbedr anns a' Chuimrigh a-measg nan àitean eile a tha a' nochdadh air geàrr-liosta an Riaghaltais a dh'fhoillsich iad as t-earrach.

Tha Mgr Stiùbhairt dhen bheachd gur e Machaire Shànais an t-àite as freagarraiche airson a' phuirt-fànais, ach tha e a' dèanamh dheth gur dòcha gum biodh cothrom na b'fheàrr aige soirbheachadh ann an co-bhann le port-adhair Phreastabhaig ann an Siorrachd Adhair.

Thuirt e gum bu chòir taic a chuir ri moladh sam bith a bheir obraichean a-steach dhan Ghàidhealtachd agus na h-Eileanan agus gum faodadh am pròiseact seo togail mòr a thoirt dhan àite a shoirbhicheas.