Sgoil Ghàidhlig ùr an Loch Abar

Bun-sgoil Ghàidhlig Loch Abar
Image caption Bidh gu leòr rùm aig an sgoil 'son ochd seòmraichean-teagaisg ma tha feum orra.

'S e là eachdraidheil a th' ann an Loch Abar agus Bun-sgoil Ghàidhlig na sgìre a' fosgladh a dorsan gu sgoilearan airson a' chiad uair.

Chosg an sgoil ùr, a tha suidhichte air Rathad Àird Dhobhair anns a' Chaol, mu £7.5m.

'S e a' chiad bhun-sgoil ùr à ceithir a tha gan togail ann an sgìre a' Ghearasdain.

Tha 70 sgoilear air a dhol dhan sgoil ùr an-diugh.

Feum

Thuige seo, bha foghlam tro mheadhan na Gàidhlig sa bhaile ri fhaighinn ann an aonad ann am Bun-sgoil Chaitligeach a' Ghearasdain, is tha pàrantan ag ràdh gur e ceum mòr air adhart a th' ann gu bheil sgoil Ghàidhlig a-nise aca.

Tha ceithir seòmraichean teagaisg san sgoil le cothrom a' cheart uimhir a bharrachd a chur rithe nam biodh feum air san àm ri teachd.

Chaidh Iain Iòsaph MacNèill ainmeachadh roimhe mar cheannard na sgoile.

Bha Mgr MacNèill, à Barraigh, roimhe na thidsear aig Bun-Sgoil Achadh na Creige san Òban is Bun-Sgoil Bheinn Chamshroin ann an Cille Bhrìghde an Ear.

Thuirt Comhairle na Gàidhealtachd gun dèan an sgoil ùr feum mòr dhan Ghàidhlig ann an Loch Abar, agus gur e goireas air leth a bhios innte dhan choimhearsnachd san fharsaingeachd.

Chaidh Bun-sgoil Ghàidhlig a thogail roimhe ann an Inbhir Nis is chaidh cead-dealbhachaidh a thoirt seachad anns t-Samhradh 'son tè a thogail ann am Port Rìgh cuideachd.

Tuilleadh air an sgeulachd seo

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile