Bunaitean gan stèidheachadh an Leòdhas

Leòdhas is Both Fhleisginn Image copyright Dylan Macphee
Image caption Camanachd Leòdhais a' farpais ri Both Fhleisginn an Lìog Tuath 2.

Dìreach beagan sheachdainnean às dèidh dhaibh comharrachadh 20 bliadhna bho chaidh iomain a stèidheachadh às ùr san eilean, tha Camanachd Leòdhais a' sìor leantainn orra leis an spòrs a fhreumhachadh sa choimhearsnachd.

Tha moladh mòr air a dhol air a' chluba airson mar a dhèilig iad ri gach cnap-starra a bha mun coinneamh bho thòisich iad Lìog Tuath 3 ann an 2011.

Cha bu chòir dha a bhith na iongnadh ma thà na Leòdhasaich fhaicinn an-dràsta nan suidhe gu comhfhurtail ann am meadhan Lìog Tuath 2, a dh'aindeoin ceistean bho chuid aig toiseach an t-seusain mu mar a rachadh leotha am measg sgiobaidhean as làidire.

'S e cluba a tha seo a bha mothachail bho thùs ge-tà air na laithean ri tighinn, gu dearbh 's ann le sùil air an òigridh is brosnachadh a thoirt dhaibh a cho-dhùin iad an ceum dhan lìog ann an 2011 a ghabhail.

Tha iad a-nise air ceum eile a ghabhail aig ìre òigridh le farpais iomain ùr ga stèidheachadh ann am Bun-sgoil Steòrnabhaigh.

Lìog

'S e lìog a bhios ann le sgioba aig gach diofar taigh-sgoile sa bhun-sgoil.

Dha na Leòdhasaich, 's e an rud as fheàrr mu dheidhinn gur e iarrtas bho na sgoilearan fhèin 'son iomain a bu choireach gum bi an lìog ann.

'S e muinntir a' chluba a bhios a' stiùireadh na lìge is trèanadh.

"Tha 40 co-dhuibh, 's dòcha barrachd, ag iarraidh iomain a dhèanamh. Tha e mìorbhaileach", thuirt Manaidsear Chamanachd Leòdhais, Iain Mac na Ceardaich.

Tha Iain a' gabhail ris gur e an dùbhlan dèanamh cinnteach gun cùm an òigridh a' dol leis an spòrs, cho math ri iomain a bhrosnachadh ann am bun-sgoiltean eile an eilein.

Farpaisean

'S e a bhith a' dèanamh cinnteach gum bi farpaisean ann dhan òigridh ann an iomain aon dòigh air sin a dhèanamh.

"Feumaidh tu a bhith ag obair gu math cruaidh nuair a tha iad a' ruighinn àrd-sgoil oir tha iad a' faighinn cothrom tòrr spòrsan eile a dhèanamh le co-fharpaisean, gu h-àraidh mar a tha ball-coise san eilean", thuirt e.

Tha dìth fharpais air bualadh air a' chiad sgioba fhèin bho chionn ghoirid le Loch Abar is Cill Mhàillidh air tarraing a-mach à geamaichean ann an Leòdhas anns na beagan sheachdainnean a chaidh.

'S e rud a tha sin air am feum Comann na Camanachd fhèin coimhead oir feumaidh cothrom air geamaichean cunbhalach a bhith ann 'son an fheadhainn òg an Leòdhas is na Hearadh a tha a' taghadh iomain.

Ceithir bliadhna às dèidh do Chalum Stamper eachdraidh a dhèanamh leis a' chiad tadhal lìge aig Camanachd Lèodhais ge-tà, faodaidh an cluba a bhith misneachail gu bheil freumhan làidir gan stèidheachadh airson nam bliadhnaichean ri tighinn.

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile