Dachaigh-cùraim an Inbhir Nis dùinte do luchd-còmhnaidh ùra

Tha NHS na Gàidhealtachd air dachaigh-cùraim an Inbhir Nis a dhùnadh do luchd-còmhnaidh ùra às dèidh do Luchd-Sgrùdaidh a' Chùraim draghan a thogail mun àite.

Thuirt am bòrd slàinte gun robh iad a' sgrùdadh Dachaigh-Cùraim Highview, ach nach b' urrainn dhaibh fiosrachadh mionaideach a thoirt seachad.

Chan fhada gus am foillsich Luchd-Sgrùdaidh a' Chùraim aithisg mu Highview.

Thuirt Barchester Healthcare leis a bheil an dachaigh-cùraim gu bheil iad a' dèiligeadh ri draghan a thog Luchd-Sgrùdaidh a' Chùraim.

Tha 70 duine ann an Dachaigh-Cùraim Highview.

Thuirt neach-labhairt bho Luchd-Sgrùdaidh a' Chùraim: "Rinn sinn sgrùdadh aig Dachaigh-Cùraim Highview bho chionn ghoirid agus bha dragh mòr oirnn mu chuid den chùram a bha an luchd-còmhnaidh a' faighinn."

Bha NHS na Gàidhealtachd ag ràdh gu bheil iad ag obrachadh còmhla ri Barchester Healthcare, Luchd-Sgrùdaidh a' Chùraim, an luchd-còmhnaidh agus an càirdean.

Thuirt Barchester Healthcare gu bheil iad a' cur plana an sàs airson dèanamh cinnteach gum bi deagh ìrean cùraim aig Highview.