Fear-ruith ga shireadh an Toirbheartan
- Air fhoillseachadh
Tha sgiobaidhean-teasairginn air taobh siar Rois a' sireadh duine bha a' ruith nam beann ann an Toirbheartan.
Cha deach Alexander Brett, a tha 65, fhaicinn bho Dhidòmhnaich seo chaidh.
Fhuair na Poilis fios Diardaoin gun robh e a dhìth.
Thuirt iad gun robh Mgr Brett an dùil slighe a dhèanamh timcheall air Beinn Èighe, Beinn Dearg, Beinn Àilleagan agus Liathach.
Dh'innis iad gum bi, mar as trice, brògan trèanaidh is poca beag air Mgr Brett nuair a tha e a' ruith.
Tha trì sgiobaidhean-teasairginn monaidh, heileacoptair nam maor-cladaich agus sgioba chon an sàs san rannsachadh.
Dh'iarr na Poilis air duine sam bith le fiosrachadh brath a chur thuca, is thuirt iad gu bheil iad gu sònraichte 'son bruidhinn ri daoine a bha a' coiseachd ann an Toirbheartan anns na beagan làithean a chaidh seachad.