Binn prìosain 'son ionnsaigh sgine

An Àrd-Chùirt an Glaschu Image copyright Stephen Sweeney / Geograph
Image caption An Àrd-Chùirt an Glaschu.

Chaidh binn prìosain còig bliadhna gu leth air fear a thug ionnsaigh le sgithinn air boireannach ann an Grìminis, Beinn nam Faoghla.

Bha Aonghas Dòmhnallach, 49, an toiseach fo chasaid gun do dh'fheuch e ris a chompanach, Anna Stiùbhairt, a mhurt.

Na bu tràithe air a' mhìos ge-tà, chaidh fhaighinn cionntach san Àrd-Chùirt an Glaschu air casaid gun tug e ionnsaigh oirre le sgithinn.

Chuala a' Chùirt gun robh an dithis air a dhol a-mach air a chèile ann an Grìminis san Fhaoilleach am-bliadhna is iad air a bhith ag òl.

Chaidh innse gun do bhuail Anna Stiùbhairt Dòmhnallach, is gun do thog e an uair sin sgian is gun do shàth e i.

Cunnart

Thuirt dotairean gun do dh'fhàg an ionnsaigh i ann an cunnart a beatha.

Bha Dòmhnallach air a dhol às àicheadh nan casaidean, is e ag ràdh gun robh e ga dhìon fhèin.

Thuirt am britheamh, Coinneach MacÌomhair QC, gun deach Dòmhnallach a dhiteadh roimhe 'son dochann san dachaigh, is gum feum a' Chùirt feart a ghabhail air an droch bheachd a th' aig a' phoball air sgian a bhith air a cleachdadh ann an suidheachadh sam bith.

Thuirt e gun robh Dòmhnallach air fhèin agus a theaghlach a mhaslachadh.

Chaidh binn prìosain còig bliadhna gu leth air Dòmhnallach, le binn a bharrachd de bhliadhna gu leth nuair a bhios e fo sgrùdadh sa choimhearsnachd.