Sgeulachd fhuadain mu Abrach Pharis

Feachdan na Frainge Image copyright Reuters

Thuirt ùghdarrasan na Frainge 's na Rìoghachd Aonaichte nach eil fiosrachadh sam bith aca mu aithrisean gun deach fear bhon Ghàidhealtachd a ghoirteachadh sna h-ionnsaighean ceannairc ann am Paris.

Chaidh cur às don chunntas Twitter a sgaoil an naidheachd mu fhear 'Hamish Calum Dòmhnallach às a' Ghearasdan" is coltas ann a-nise nach robh ann ach breugan.

Bha boireannach ag ràdh gur e co-ogha dhi a bh' ann.

Cha d' fhuair am BBC lorg air duine sa Ghearasdan a bha eòlach air Hamish Calum Dòmhnallach ge-tà.

Chaidh an gnothach a thogail ann an Taigh nan Cumantan Diluain le BP Rois, an Eilein Sgitheanaich is Loch Abar, Iain Blackford.

Thuirt Mgr Blackford oidhche Mhàirt gun robh coltas ann a-niste gur e sgeulachd fhuadain a bh' ann, 's gur e tàmailt a bh' ann.