Stiùidio
Cha chluich seo air an uidheamachd agaibh

Naidheachdan 11:00m

20 An t-Samhain 2015 Ùraichte aig Ùraichte aig

Màlaidh

Tha aithrisean ann gun deach co-dhiù triùir a mharbhadh ann an ionnsaigh a thug luchd-gunna Ioslamach air taigh-òsta ann am Màlaidh. Tha ùghdarrasan na dùthcha ag ràdh gun tugadh 170 duine am bruid ann an taigh-òsta an Radisson Blue anns a' phrìomh bhaile Bamako.

Saint Denis

Chaidh an treas corp a lorg anns an togalach air an do rinn Poilis na Frainge rèad ann an Saint Denis a' bhòn-dè. Tha fhios mar thà gun do chuir boireannach às dhi fhèin le seacaid-spreadhaidh, agus gun deach ceannard nan ceannarcach, Abdelhamid Abaaoud, a mharbhadh. Ach tha na Poilis a-nis ag ràdh gu bheil iad air corp boireannaich eile fhaighinn.

Tèarainteachd

Tha ministearan dùthcha an Aonaidh Eòrpaich a' coinneachadh an-dràsta anns a' Bhruiseil a bhruidhinn air tèarainteachd an dèidh ceannairc Pharis. Tha an Fhraing ag iarraidh cùisean a theannachadh air crìochan Sòn Schengen - sin an sòn anns am faodar gluasad eadar dùthchannan gun chàirt-siubhail.

Kaylee Haywood

Nochd dithis fhireannach anns a' chùirt co-cheangailte ri murt an deugaire Kaylee Haywood ann an Leicestershire. Chaidh Stephen Beadman, a tha 28, a chur fo chasaid muirt agus èigneachaidh. Tha Luke Harlow, a tha 27, fo chasaid gun robh e ri grùmadh agus a' feise le òganach. Chaidh an dithis a chumail an grèim.

Poilis Dìomhair

Thabhainn Poilis a' Mhet leisgeul do sheachdnar bhoireannach a bha a' leannanachd le oifigearan poilis dìomhair gun fhiosta dhaibh. Tha e coltach gun do phàigh am Met airgead-dìolaidh dha na boireannaich, ach chan eil iad ag innse dè na phàigh iad.

Ionatan Pollard

Chaidh Aimeireaganach a bha na fhear-brathaidh do dh'Israel a shaoradh à prìosan Aimeireaganach an dèidh 30 bliadhna. Bha e fo bhinn beatha. Chaidh Ionatan Pollard, a bha roimhe na oifigear-brathaidh aig nèibhidh nan Stàitean Aonaichte, fhaighinn a' reic phàipearan dìomhair ann an 1985.

Dà-chànanachas

Tha daoine air an tig stròc nas buailtiche faighinn seachad air ma tha barrachd air aon chànan aca. Tha sin a rèir rannsachaidh a rinn Oilthigh Dhùn Èideann. Ach cha do rinn iad a-mach fhathast carson a tha seo.

Pròiseact nan Ealan

Math dh'fhaoidte gun robh Pròiseact nan Ealan an sàs ann am pròiseactan a bha ro mhòr, a rèir fir a bha roimhe air bòrd-stiùiridh na buidhne. Bha Calum Angus MacAoidh a' bruidhinn an dèidh na naidheachd gun tèid Pròiseact nan Ealan à bith, 's gun airgead aca a chumas a' dol iad às dèidh deireadh na bliadhna. Thuirt Mgr MacAoidh nach robh e airson am pròiseact a chàineadh, ach gur dòcha nach robh fòcas air a bhith aca air na rudan bunaideach.