Iasad ùr airson beartan a cheannach

Beart
Image caption Tha gnìomhachas a' Chlò Hearaich a' soirbheachadh gu mòr an-dràsta

Gheibh Ùghdarras a' Chlò Mhòir iasad de £25,000 bho Chomhairle nan Eilean Siar airson beartan ùra a cheannach.

Cleachdar airgead bho stòras a chaidh a chur air dòigh bho chionn grunn bhliadhnaichean nuair a bha gnìomhachas a' Chlò Hearaich ann an stait gu math ìosal.

Tha cùisean air tighinn air adhart gu mòr bhon uairsin le 1.5m meatair dhen chlò a-nis air a dhèanamh sa bhliadhna - suas bho 450,000 meatair ann an 2008.

Beartan ùra

Bheir Comhairle nan Eilean Siar iasad de dh'Ùghdarras a' Chlò Mhòir airson sia beartan ùra a cheannach.

Thèid iad seo còmhla ri sia beartan eile a tha Urras Horsiadar agus Urras Tholastaidh a cheannach.

Thuirt Iar-chathraiche Chomataidh an Leasachaidh Mhaireannaich aig Comhairle nan Eilean Siar, Dòmhnall Crichton, gun cruthaich seo barrachd chothroman anns a' ghnìomhachas.

"Bidh cothrom aig daoine a-nis a thighinn a-steach dhan ghnìomhachas agus sgilean ùra ionnsachadh a thaobh na beairt agus a' Chlò Hearaich agus tha sinn toilichte gu bheil sinn comasach air an taic seo a thoirt seachad aig an àm a tha seo", thuirt e.

Tha 170 beart anns na h-Eileanan an-dràsta.

Tuilleadh air an sgeulachd seo