Cothrom Dick Walsh a cheasnachadh

Feumaidh Comhairle Earra-Ghàidheal 's Bhòid £26m a chùmhnadh thairis air an ath-chòig bliadhna.

Bidh cothrom aig daoine ceistean a chur air Ceannard Chomhairle Earra-Ghàidheal is Bhòid, Dick Walsh, air loidhne oidhche Luain.

Bidh Mgr Walsh ri fhaotainn air làrach-lìn na Comhairle eadar 6:00f agus 7:00f, airson ceistean a fhreagairt mu phlanaichean na Comhairle airson £26m a chùmhnadh san ath-chòig bliadhna.

Thuirt e gu bheil cha mhòr 800 duine air beachdan a chur thuca mar-thà air na th' anns an amharc aca airson airgead a shàbhaladh.

Chaidh plana connspaideach airson an àireamh luchd-obrach a bheir taic do chloinn le feumalachdan sònraichte anns na sgoiltean a ghearradh 45% a leigeil às bho chionn beagan sheachdainnean.