BBC Naidheachdan

Gearradh an fheòir aig an Nollaig

Published
image copyrightCastle Stuart Golf Course
image captionBidh Farpais Fhosgailte ga cumail aig Caisteal Stiùbhairt anns an Iuchair.

Leis cho blàth 's a tha an aimsir air a bhith, b' fheudar do luchd-obrach aig Raon Goilf Chaisteil Stiùbhairt uairean a bharrachd a dhèanamh Diardaoin airson am feur a ghearradh air an raointean.

Seo a' chiad uair a tha iad air am feur a ghearradh san Dùbhlachd.

Mar is trice 's ann aig deireadh na Samhain a tha iad a' cur crìoch air na raointean, ach le aimsir cho blàth ri 10 celcius, tha am feur air a bhith a' fàs ge b'oil leotha.

Tha iad cuideachd air mothachadh gu bheil conasg air a bhith fàs agus mar is àbhaist chan fhaicear sin gu deireadh a' Ghearrain neo toiseach a' Mhàirt.

Sìde Ropach

Thuirt Manadsear an raoin, Chris Haspell 'Tha e math ann an dòigh nach eil feum againn a bhith ag obair ann an sìde ropach, geamhradail, ach aig an aon àm, tha trioblaidean againn, a chionn cha tèid biastagan beaga a mharbhadh le reothadh, agus mar sin bidh droch bhuaidh aca air an fheur'.

'Tha e na dhùbhlan dhuinn aig an àm-sa den bhliadhna, ach tha sinn a' cumail sùil air cùisean agus bidh sinn deiseil son an t-sneachda nuair a thig e'.

Bidh Farpais Fhosgailte na h-Alba ga cumail aig Caisteal Stiùbhairt bhon a 7-10mh an Iuchair.

Seo an ceathramh turas ann an 6 bliadhna a tha an fharpais air a bhith air bruaichean Linne Mhoirbhe.