Stiùidio
Cha chluich seo air an uidheamachd agaibh

Naidheachdan 11:00m

6 Am Faoilleach 2016 Ùraichte aig Ùraichte aig

Na Làbaraich

Dh'fhàg Johnathan Reynolds a dhreuchd mar mhininstear airson na rèile ann an caibineat nan Làbarach an dèidh an atharrachaidh a thug Jeremy Corbyn air na prìomh dhreuchdan. Thuirt Mgr Reynolds gu bheil e a' dèanamh sin mar thaic do Pat McFadden a chaill a dhreuchd e fhèin mar fhear-labhairt air cùisean Eòrpach. Tha aithrisean ann gun robh Mgr Corbyn mì-thoilichte mu bheachdan Mhgr McFadden an dèidh na ceannairc ann am Paris. Chaidh an Seansalair Làbarach, John MacDonnell às àicheadh gu bheil Mgr Corbyn a' cur casg air saorsa-labhairt anns a' phàrtaidh.

Coirea a Tuath

Tha Comhairle Thèarainteachd nan Dùthchannan Aonaichte a' gairm coinneimh èiginn an dèidh do Choirea a Tuath innse gun do rinn iad deuchainn shoirbheachail airson a' chiad uair air boma haidhdroidean. Thuirt Rùnaire nan Dùthchannan Cèine, Philip Hammond, gu bheil a h-uile coltas ann gun tèid tuilleadh chasg-bhannan air Coirea a Tuath. Tha dùthchannan eile ge-tà a' cur teagamh anns an fhiosrachadh a thàinig bho Choirea a Tuath, agus iad ag ràdh nach robh an spreadhadh a bh' ann cho mòr 's a bhitheadh dùil airson deuchainn den t-seòrsa sin.

Bàs In-imrichean

B' e 2015 a' bhliadhna as miosa fhathast airson bàs am measg luchd-imrich agus luchd-siridh comraich air a' Mhuir Mheadhan-Thìrich air slighe dhan Roinn Eòrpa. Chaill 3,771 duine am beatha an-uiridh - cha-mhòr 500 a bharrachd air na bh' ann ann an 2014.

Gunnaichean nan Stàitean Aonaichte

Tha ceannardan poblachdach anns na Stàitean Aonaichte a' càineadh a' Chinn-Suidhe Obama agus oidhirp air lagh nan gunnaichean a neartachadh. Thuirt Fear-Labhairt Thaigh nan Riochdairean, Paul Ryan, gun tèid dùbhlan a thogail anns na cùirtean an aghaidh nam planaichean, agus thuirt e gu bheil Mgr Obama a' cur às do shaorsa.

Rest and Be Thankful

Thèid clach mhòr a leagail bho os cion rathad an A83 aig an Rest and Be Thankful ann an Earra-Ghàidheal feasgar an-diugh. Thèid a' chlach a spreadhadh agus a dhèanamh sàbhailte. Tha an rathad sin air a bhith dùinte a-rithist an t-seachdain seo chaidh agus aig toiseach na seachdain seo - rud a tha a' piobrachadh iarrtais às ùr anns an sgìre airson leasachaidh mhaireannaich.

Bann-Leathann Sgitheanach

Chaidh ceudan dhaoine san Eilean Sgitheanach còmhla mar bhuidhinn air na meadhanan sòisealta 's iad a' gearain air cho truagh 's a tha am bann-leathainn ann an cuid den eilean. Tha an t-seirbheis air a bhith slaodadh ro àm na Nollaige agus chaill cuid ann an ceann an iar-thuath an eilein am bann-leathann gu lèir airson ùine bho chionn ghoirid. Thuirt BT gun tug uisge buaidh air stèisean a tha a' frithealadh air sgìre Dhùn Bheagain, agus gu bheil iad cuideachd ag obair air ionad faisg air a' Bhlàr Dhubh a tha a' toirt sheirbheisean dhan Eilean Sgitheanach.