Slaic air SSE

Thug comhairliche à Steòrnabhagh slaic air a' chompanaidh SSE.

Tòisichidh sreath de thaisbeanaidhean aig SSE mu bhochdainn connaidh ann an Steòrnabhagh is Barabhas Diluain.

Bidh coinneamhan eile air feadh nan Eilean Siar tron t-seachdain.

Thuirt an Comh. Aonghas MacCarmaig ge-tà, nach eil SSE a' dèanamh gu leòr airson daoine a tha a' fulang bochdainn connaidh a chuideachadh.

Sanasachd

A rèir Mhgr MhicCarmaig, cha deach na coinneamhan a shanasachd ceart.

Thuirt e mar sin gu bheil e ro fhadalach do dhaoine a bhith an làthair.

Thuirt SSE gum bi luchd-obrach aca aig na bùithdean-obrach 'son stiùireadh a thoirt do dhaoine.

Dh'innis iad gum bi fiosrachadh aca mu sgeamaichean taice agus comhairle do dhaoine air mar a phàigheas iad na cunntasan aca.

Bidh na bùithean-obrach uile ann eadar 6:00f is 8:00f.

Coinneamhan

Diluain bidh SSE ann an Talla Bhaile Steòrnabhaigh agus ann an Ionad Coimhearsnachd Bharbhais.

Bidh iad Dimàirt ann an Sgoil Lionacleit agus Taigh-Òsta na Hearadh.

Diciadain bidh iad ann an Ionad Coimhearsnachd Bhàgh a' Chaisteil agus Taigh-Òsta na Creige Àirde.

Thig na coimmhean gu ceann Diardaoin an Ionad Coimhearsnachd Ùige is Ionad Rubha an Fhithich.