Marine Harvest a' gearradh 87 cosnadh

Caillidh 87 neach an cosnadh aig a' chompanaidh àraich èisg Marine Harvest ro dheireadh na mìos.

Tha an luchd-obrach a' feitheamh fios cò a thèid a leigeil dheth - ach tha e coltach gum bi a' chuid as motha de na cosnaidhean co-cheangailte ri giollachd agus tuathanasan aig muir.

Leig Marine Harvest fios dhan luchd-obrach aca air an 21mh den Fhaoilleach gum biodh suas ri ceud aca a' call an cosnaidh.

An t-seachdain seo chaidh, chaidh innse dhaibh dè na roinnean den chompanaidh air an toir seo buaidh.

Roinnean

Thèid 31 cosnadh a chall a thaobh giollachd èisg, 33 anns na tuathanasan èisg aig muir, ceithir anns na tuathanasan a tha stèidhichte air lochan agus 19 bhon luchd-obrach taice a tha an urra ri innleadaireachd is eile.

Leis gun deach gealltanas a thoirt do chomhairlichean ann an Fìobha nach deadh obraichean a chall anns an fhactaraidh ghiollachd ann an Ros Saoithe, tha sin a' togail cheist mun fhactaraidh ghiollachd anns a' Ghearasdan.

Dhiùlt an luchd-obrach gabhail ri gearradh ann am pàigheadh, agus uairean nas giorra mar phàirt de dh'oidhirp airson obraichean a shàbhaladh.