Iomairt ga cur dheth

Tim Newton agus Rachel Slater Image copyright Poilis na h-Alba

Chaidh iomairt theasairginn air an talamh gus dithis shreapadairean a chaidh a dhìth air Beinn Nibheis a lorg a stad ri linn cunnairt bho mhaoimtean-sneachda.

Bha an cupal òg - Rim Newton, 27, agus a leannan Rachel Slater, 24, à Bradford ann an Sasainn, a' càmpachadh aig bun taobh tuath na beinne, 's dùil aca grunn làithean a chur seachad a' sreap.

Cha do thill iad chun an teanta aca ge-tà, agus cha chuala duine càil bhuapa bho Dhidòmhnaich.

Chuir an droch shìde stad air an iomairt theasairginn Dimàirt.

Bha a' ghaoth a' ruighinn 80 m.s.u. agus theab dithis den sgioba a bhith air an glacadh ann am maoim-sneachda.

Bha an aimsir na cnap-starra a-rithist madainn Diciadain, 's ged a thàinig piseach mòr oirre, thuirt an sgioba teasairginn gu bheil fhathast nàdar an t-sneachda ga fhàgail ro chunnartach a dhol a choimhead mu chliathaich na beinne Diardaoin.