Ministear ùr airson Eaglais Shaor Steòrnabhaigh

Ghabh an t-Urr. Seumas MacÌomhair ri gairm a dhol na mhinistear air Eaglais Shaor Steòrnabhaigh.

Tha Mghr MacÌomhair, a tha 61, air a bhith na mhinistear air coithional a' Chnuic anns an Rubha ann an Leòdhas bho 1997.

Thèid a phòsadh ri coithional Steòrnabhaigh air an 23mh là dhen ath-mhìos.

"Co-dhùnadh duilich"

Thuirt Mghr MacÌomhair gur e co-dhùnadh duilich a bh' ann dha, 's ceangal dlùth aige ris a' choithional aige anns an Rubha.

Rinn e moladh mòr air an taic a thug iad dha fad 19 bliadhna.

Bha e roimhe na mhinistear ann an Cille Bhrìghde an Ear agus bha e na mhodaràtair air Àrd-sheanadh na h-Eaglaise ann an 2011.

Gabhaidh e àite an Urramaich Ìomhar Màrtainn a tha a-nis na Phrionnsabal làn-ùine air Seminary Diadhaireachd Dhùn Èideann.

Tha an t-Urr. Coinneach I. MacLeòid na leas-mhinistear air a' choithional.