"Bu chòir fios a bhith aca"

Blas Image copyright Blas

Dh'iarr Àrd-Stiùiriche Fèisean nan Gàidheal coinneamh le Comhairle na Gàidhealtachd mu luach na fèis ciùil, Blas.

Rinn Art MacCarmaig toileachas le naidheachd bhon Chomhairle Diardaoin nach tèid maoineachadh Bhlas a ghearradh am-bliadhna.

Bha an t-ùghdarras a' meòrachadh air taic na fèise a lùghdachadh is aca ris na milleanan mòra a chaomhnadh.

Thuirt Mgr MacCarmaig gum biodh gearradh de 81% thairis air trì bliadhna air cur às de Bhlas.

Thuirt e gun tàinig na molaidhean an t-seachdain seo mar chlach às an adhair.

Tha feum a-nise, tha e ag ràdh, air soillearachadh air luach na fèise.

"Bu chòir barrachd fios a bhith aig oifigearan na comhairle, is na comhairlichean fhèin, air luach na fèise is na tha i a' toirt dhan Ghàidhealtachd", thuirt Mgr MacCarmaig.

"Tha amharas agam, 's dòcha, gum bi sinn san aon suidheachdadh an ath-bhliadhna is mar tha sin tha e cudromach gu bheil sinn a' bruidhinn ris a' Chomhairle san eadar-ama airson a dhearbhadh dhaibh dè na tha iad a' faighinn bho Bhlas.

"Chan ann a-mhàin mun airgead acasan a tha e, ach gu bheil airgead eile a' tighinn a-steach dhan sgìre ri linn Blas bho bhuidhnean nàiseanta eile", thuirt e.

Thuirt Mgr MacCarmaig gur e briseadh-dùil a th' ann dha gum feum e coinneamh iarraidh.

"Bu chòir fios a bhith aca le cinnt. Tha triùir chomhairlichean a' suidhe air Bòrd-Stiùiridh Blas Earranta.

"Chan e sin a-mhàin, tha oifigearan taobh a-staigh na Comhairle a tha còir a bhith a' coimhead às ar dèidh, tha iad air ainmeachadh sa chùmhnant againn, ach glè bheag de thaic a tha sinn a' faighinn bhuapa", thuirt e.

Dh'innis Mgr MacCarmaig gu bheil e a' tuigsinn gum bi gearraidhean ann, ach gum bu chòir dhaibh a bhith air an roinn air feadh iomadh buidheann.

Tuilleadh air an sgeulachd seo

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile