Sgeama nan gèadh ga leudachadh

Image copyright Getty Images

Image caption Bha dùil gun tigeadh an spadadh ann an Leòdhas 's na Hearadh gu ceann aig deireadh a' Mhàirt.

Leudaichidh Dualchas Nàdair na h-Alba sgeama a bheir cead do dhaoine ann an Leòdhas 's na Hearadh losgadh air geòidh ghlasa.

Bha dùil gun tigeadh an spadadh gu ceann aig deireadh a' Mhàirt ach cumaidh e a' dol a-nis chun an 16mh là den Ghiblean.

'S e seo an dàrna bliadhna den sgeama, 's a' bhuidheann ionadail a tha ga stiùireadh ag ràdh gu bheil tuilleadh ùine a dhìth airson targaidean spadaidh a choileanadh.

Feumaidh daoine a tha airson losgadh air na h-eòin a bhith clàraichte le Dualchas Nàdair na h-Alba.

Tha croitearan air dragh mòr a nochdadh mun chall a tha na geòidh ghlasa a' dèanamh air tàlamh àitich.