Dh'eug an Hiortach mu dheireadh

  • 7 An Giblean 2016
Raonaid NicIain (sa mheadhan le a h-aodann falaichte). Image copyright Urras Nàiseanta na h-Alba
Image caption Tha Raonaid NicIain a' nochdadh san dealbh seo o na 1920an, 's a h-aodan beagan falaichte ann am meadhan na buidhne cloinne.

Bhàsaich an neach mu dheireadh a bha beò a rugadh ann an Hiort.

Rugadh Raonaid NicIain san eilean anns an Iuchar 1922, agus bha i ochd bliadhna de dh'aois nuair a dh'fhàg na daoine air 29mh an Lùnastal 1930.

Chaidh i a dh'fhuireach a Bhruaich Chluaidh, far an do phòs i.

Chuir i na bliadhnaichean mu dheireadh aice seachad ann an dachaigh-cùraim sa bhaile.

Image copyright Urras Nàiseanta na h-Alba
Image caption Thill Raonaid a Hiort corra-uair le Hiortaich eile. 'S i an treas neach on làimh dheis san dealbh seo bho na 1980an.

Thill i corra-uair chun an eilein còmhla ri Hiortaich eile.

Thuirt Urras Nàiseanta na h-Alba, leis a bheil Hiort, gur e tè gu math prìobhaideach a bh' innte.

Thuirt Alasdair Bennett, Manaidear Tuaithe agus Eileanan a Tuath aig Urras Nàiseanta na h-Alba:

"'S e là brònach a th' ann, agus dha-rìribh deireadh linne, agus sinn a' cluinntinn gun do bhàsaich an Hiortach mu dheireadh.

"Bha mi cho fortannach 's gun do thachair mi ri Raonaid grunn thursan. Bha i gu math prìobhaideach, ach gu math coibhneil.

"Às leth Urras Nàiseanta na h-Alba, agus a h-uile duine a tha a' coimhead às dèidh Hiort, nochdamaid co-bhròn do a teaghlach agus a h-iomadh caraid."