Stiùidio
Cha chluich seo air an uidheamachd agaibh

Naidheachdan 11:00m

13 An Giblean 2016 Ùraichte aig Ùraichte aig

Manifesto nan Tòraidhean

Dh'aidich ceannard nan Tòraidhean an Alba, Ruth Davidson, gu bheil an SNP air chùrsa an taghadh airson na Pàrlamaid Albannaich a ghlèidheadh, ach thuirt i gu bheil na Tòraidhean dha-rìribh ag amas air an dàrna àite ann an Holyrood. Chaidh manifesto nan Tòraidheach fhoillseachadh ann an Glaschu an-diugh, le gealltanas cuideachd air strì an aghaidh an dàrna referendum air neo-eisimeileachd.

John Whittingdale

Tha na Làbaraich ag ràdh gum bu chòir do Rùnaire a' Chultair, John Whittingdale, seasamh air ais bho a bhith a' riaghladh nam meadhanan, an dèidh aithrisean mu a bheatha phrìobhaidich. Tha Mgr Whittingdale a' dol às àicheadh gun tug a chàirdeas le siùrsach mus deach e dhan Chaibineat buaidh air a chuid obrach. Ged a bha fios aig na h-uimhir de na pàipearan-naidheachd mun chùis aig an àm, cha do chuir iad dad dheth an clò, agus iad ag ràdh nach e gnothach poblach a bh' ann.

Sgoiltean Dhùn Èideann

Thill còrr is 1,000 duine-cloinne an-diugh gu sia de na 17 sgoiltean an Dùn Èideann a tha dùinte le dragh mu shàbhailteachd nan togalach. Chaidh prìomhachas a thoirt do sgoilearan sa cheathramh, còigeamh agus siathamh bliadhna san àrd-sgoil, aig a bheil deuchainnean a dh'aithghearr. Ach tha sin fhathast a' fàgail còrr is 7,000 sgoilear far na sgoile.

Tesco

Thill Tesco gu prothaid, dìreach bliadhna an dèidh call cho mòr 's a bh' aig buidhinn chorporra riamh ann am Breatainn. Rinn iad prothaid de £162m an-uiridh, an dèidh call de £6.3bn ann an 2014.

Aiseag Armadail

Tha coinneamh eadar Caledonian Mac a' Bhriuthainn an-diugh agus muinntir Shlèite a tha a' gearain gu làidir mun t-seirbheis eadar Malaig is Armadal. Tha Fòram Còmhdhail Shlèite ag ràdh gu bheil maill air seirbheisean bho thòisich clàr-ama an t-Samhraidh a' dèanamh cron air an eaconamaidh. Thuirt Cal Mac gu bheil iad a' cumail sùil gheur air an t-seirbheis sin, ach gu bheil barrachd dhaoine air an t-slighe a chleachdadh air a' chiad chola-deug de chlàr-ama an t-Samhraidh na rinn aig an aon àm an-uiridh.

Tubaist-rathaid

Tha Poilis Alba ag iarraidh fiosrachaidh bho dhuine sam bith a chunnaic tubaist-rathaid air taobh sear Rois an-raoir, anns an deach duine, a tha 78 bliadhna de dh'aois, a dhroch-ghoirteachadh. Thachair an tubaist eadar dà chàr - Vauxhall Corsa dhearg agus Landrover Discovery gheal - mu 7:00f an-raoir, air an A9 beagan deas air Drochaid Chrombaidh.