Stiùidio
Cha chluich seo air an uidheamachd agaibh

Naidheachdan 11:00m

27 An Giblean 2016 Ùraichte aig Ùraichte aig

Saleh Abdeslam

Chaidh an duine as motha a tha fo amharas mun cheannairc ann am Paris an-uiridh, a thoirt dha na h-ùghdarrasan anns an Fhraing. Chaidh Saleh Abdeslam a chur an grèim anns a' Bheilg air a' mhìos a chaidh. Tha e coltach gur e an aon fhear de na ceannaircich a thàinig beò às na h-ionnsaighean ann am Paris anns an t-Samhain. Tha amharas ann cuideachd gu bheil ceanglaichean aige ris na bomairean a thug ionnsaighean air a' Bhruiseil air a' mhìos a chaidh.

Hillsborough

Bidh sreath thachartasan ann an Liverpool an-diugh mar chuimhne air an 96 duine a chaill am beatha ann an tubaist Hillsborough, dìreach là an dèidh co-dhùnadh gur e marbhadh mì-laghail a bh' ann. Thuirt an Diùraidh gun do rinn na Poilis mearachdan nan ullachadh ro-làimh, agus air là a' gheama bhuill-choise ann an Sheffield anns a' Ghiblean 1989, 's tha feadhainn a-niste ag iarraidh casaidean a thogail.

An Eaconamaidh

Thàinig beagan maill air fàs eaconamach na Rìoghachd Aonaichte air a' chiad thrì mìosan den bhliadhna. Bha toradh na dùthcha aig 0.4% - sìos bho 0.6% aig deireadh 2015.

Barclays

Thuit an ceathramh cuid far prothaid Banca Barclays air a' chiad thrì mìosan den bhliadhna bho £1.8bn aig an aon àm an-uiridh, gu beagan nas lugha na £800m am-bliadhna. Thuirt am banca gur e margaidh dhoirbh ann an roinn tasgaidh a' ghnìomhachais as coireach.

ASDA

Tha ùghdarras na farpais agus margaidh a' càineadh ASDA airson siostam phrìsean agus sanasachd a tha toinnte agus doirbh a thuigsinn. Tha buidheann an luchd-cleachdaidh, Which?, a' fàgail air na h-uimhir de na bùthainnean mòra gu bheil iad ri dòighean reic meallta, agus dh'aontaich ASDA an dòigh sa bheil iad a' sanasachd atharachadh.

Melissa Reid

Tha coltas ann gum bi boireannach a th' anns a' phrìosan ann am Peru a' tilleadh dhachaigh a dh'Alba a dh'aithghearr. Chaidh Melissa Reid, a bhuineas do Leanaidh ann an Siorrachd Dhùn Bhreatann, a dhiteadh airson cùiltearachd dhrogaichean ann am Peru. Ach tha Oifis nan Dùthchannan Cèine ann an Lunnainn ag ràdh gun tug cùirt ann an Lima cead dhi tilleadh a Bhreatinn.

Col Uarach

Tha buill air Comhairle nan Eilean Siar ag iarraidh eadar-mheadhanair neo-eisimeilich anns a' bhuaireadh eadar croitearan ann an Col Uarach ann an Leòdhas agus Coimisean na Croitearachd. Choinnich ceathrar chomhairlichean an-dè ris an fheadhainn a bh' air a' chomataidh ionaltraidh gus an do chuir an Coimisean às an dreuchd iad. Cha chan an Coimisean càil fhad 's a tha iad a' rannsachadh na cùise.