Nàbaidhean co-ionnan am Port Rìgh

Sgitheanaich air an dòigh Image copyright Neil G Paterson
Image caption Rinn na Sgitheanaich toileachas às dèidh tadhal anmoch sa gheama.

Tha Ceann Loch Seile air mullach na Prìomh Lìge às dèidh dhaibh fhèin is Camanachd an Eilein Sgitheanaich crìochnachadh co-ionnan 1-1 ann am Port Rìgh.

B'e geama eachdraidheil a bh' ann agus na nàbaidhean a' coinneachadh aig ìre na Prìomh Lìge 'son a' chiad uair.

Bha sluagh mòr aig Pàirc nan Laoch is rinn Ceann Loch Seile deagh thoiseach-tòiseachaidh, Donnchadh DA MacRath gan cur air thoiseach às dèidh 13 mionaidan.

Làmh an uachdair

Bha làmh an uachdair aig Ceann Loch Seile tron chiad leth, ach chaidh na sgiobaidhean a-steach aig letheach ùine aig 1-0.

Thàinig na Sgitheanaich air ais dhan gheama san dàrna leth agus sa mhionaid mu dheireadh, fhuair iad an tadhal.

Chuir Gilleasbuig MacDhòmhnaill buille-oisein a-steach is bha Jordan MacCalmain ann gus am ball a dhrilleadh àrd dhan lìon.

Puing an urra is coltas ann gun robh an dà sgioba an ìre mhath riaraichte.

Cha robh cùisean buileach deiseil aig a sin, ge-tà, is na sgiobaidhean cuideachd a' farpais 'son Chupa Thòmais Fhearghasdain.

Slaicean

Chluich iad slaicean-peanais is shoirbhich le Ceann Loch Seile gus an cupa a thoirt dhachaidh.

Chìthear aithris air a' gheama air An Là air BBC Alba oidhche Luain, is coinnichidh na sgiobaidhean a-rithist ann am Port Rìgh an ath-mhìos ann an Cupa MhicAmhlaidh.

Anns na geamaichean eile sa Phrìomh Lìog rinn Lòbhat an gnothach air Ceann a' Ghiuthsaich 3-1.

Leum

Leum Gleann Urchadain os cionn Loch Abair às dèidh dhaibh a' chùis a dhèanamh air na h-Abraich 2-0.

San Lìog Nàiseanta shoirbhich le Cill Mhàillidh 5-1 an aghaidh Bhaile a' Chaolais is rinn Inbhir Aora an gnothach 3-2 air Inbhir Nis.

Chaidh an geama sa Chupa Cheilteach eadar Camanachd an Òbain is Caol Bhòid a chur dheth.