Stiùidio
Cha chluich seo air an uidheamachd agaibh

Naidheachdan 11:00m

3 An t-Ogmhìos 2016 Ùraichte aig Ùraichte aig

A' Ghrèig

Thuirt maoir-chladaich na Grèige gun deach còrr is 300 duine a thoirt beò às a' mhuir far an deach car de bhàta air an robh ceudan de luchd-imrich faisg air Eilean Crete. Thug iad trì chuirp às an uisge aig an ìre seo, agus tha obair theasairginn mhòr a' dol air adhart le heileacoptairean agus bàtaichean.

An t-Aonadh Eòrpach

Dh'aidich Daibhidh Camshron gu bheil in-imreachd à dùthchannan Eòrpach eile na trioblaid do Bhreatainn. Ach thuirt e gun toireadh muinntir Bhreatainn droch bhuile eaconamach orra fhèin le bhòt airson an AE fhàgail. Thuirt am Prìomhaire gur e amaideas a bhiodh ann an AE fhàgail airson cumail ri gealltanas Tòraidheach àireamh na h-in-imreachd a ghearradh gu nas lugha na 100,000. Ach thuirt Rùnaire Èireann a Tuath, Theresa Villiers, a tha airson an AE fhàgail, gum feum Breatainn smachd a ghabhail a-rithist air a crìochan fhèin.

An M8

Tha rathad an M8 fosgailte gach taobh a-rithist an dèidh tubaiste le làraidh anns a' mhadainn an-diugh aig Ceann-Rathaid 8 aig Bailieston, ach tha maill mhòr fhathast air an trafaig anns an sgìre. Fhuair dràibhear na làraidh às gun droch leòn.

An Ola

Bidh dithis mhinistearan ann an Riaghaltas na h-Alba a' coinneachadh ri riochdairean na h-ola a dheasbad taic fhad 's a tha crìonadh anns a' ghnìomhachas. Bidh Keith Brown agus Paul Wheelhouse a tha os cionn na h-eaconamaidh agus cumhachd a' cumail nan còmhraidhean ann an Obar Dheathain.

MV Coir' Uisg'

Sgrìobh comhairliche ann am Muile gu Prìomh Mhinistear na h-Alba, Nicola Sturgeon, a' gearain gun tèid am bàt-aiseig an Coir' Uisg' a thoirt air falbh bho shlighe Mhuile agus i a' tilleadh dhan t-seirbheis eadar Malaig is Armadal. Bha connspaid ann nuair a chiadh a toirt far sheirbheis an Eilein Sgitheanaich. Ach tha an Comh. Màiri Jean Devon ag ràdh gur e Muile as fheumaiche oirre leis gu bheil drochaid ann dhan Eilean Sgitheanach.

Dìon Cloinne

Tha luchd-obrach sòisealta, àrd-oifigearan poilis agus ministearan an Riaghaltais a' coinneachadh ann am Peairt an-diugh a dheasbad dìon cloinne. 'S fhada bho chaidh a' choinneamh seo a chur air dòigh, ged a tha mòran a bharrachd aire air a' chùis a-niste le murt a' ghille bhig Liam Fee.