Stiùidio
Cha chluich seo air an uidheamachd agaibh

Naidheachdan 11:00m

29 An t-Ogmhìos 2016 Ùraichte aig Ùraichte aig

An Eu

Tha Nicola Sturgeon air a bhith a' coinneachadh ri àrd-oifigich Eòrpach sa Bhruiseil, a bhruidhinn air an dàimh eadar Alba is an EU às dèidh dhan Rìoghachd Aonaichte bhòtadh airson tarraing a-mach. Na bu tràithe choinnich Prìomh Mhinistear na h-Alba ri Ceann-Suidhe na Pàrlamaid Eòrpaich, Màrtainn Schulz, agus feasgar cumaidh i còmhraidhean ri Ceannard a' Choimisein Eòrpaich, Jean-Claude Junker.

'S tha ceannardan dùthchannan an EU a' coinneachadh anns a' Bhruiseil an-dràsta a dheasbad buaidh an referendum. Airson a' chiad uair ann an còrr is 40 bliadhna chaidh Breatainn a dhùnadh a-mach às na còmhraidhean.

Glaschu

Chaidh sgrùdadh muirt a chur air chois ann an Glaschu às dèidh bàs fhireannaich ann an ionnsaigh sgeine. Chaidh poilis a ghairm gu Sràid Abercrombie ann an sgìre Bridgeton goirid às dèidh meadhan oidhche. Chaidh fireannach aosta a thoirt dhan Ospadal Rìoghail, ach chaochaill e goirid às dèidh sin. Tha oifigearan air an rathad timcheall air làrach na h-ionnsaigh a dhùnadh.

Istanbul

Tha oifigich san Tuirc den bheachd gur e an Stàit Ioslamach a bh' air cùl na h-ionnsaigh ceannairce air prìomh phort-adhair Istanbul an-raoir. Chaidh co-dhiù 36 duine a mharbhadh nuair a thòisich triùir luchd-gunna a' losgadh orra mus do spreadh iad bomaichean fèin-mhairbhteach ann am Port-Adhair Ataturk. Thuirt Oifis nan Dùthchannan Cèine gu bheil iad a' rannsachadh an robh Breatannaich sam bith air an goirteachadh anns an ionnsaigh.

Na Tòraidhean

Fosglaidh am pròiseas tagraidh airson ceannard ùr a thaghadh dhan Phàrtaidh Thòraidheach a-nochd fhathast. Tha Rùnaire na h-Obrach 's nam Peinnseanan, Stephen Crabb, air innse gun seas esan airson na dreuchd. Tha dùil cuideachd gun cuir Boris Johnson agus Theresa May an ainmean air adhart.

Saima Ahmad

Tha poilis a tha a' rannschadh mar a chaidh an corp aig boireannach à Lunnainn a lorg faisg air Dùn Èideann ag ràdh gu bheil iad air fiosrachadh ùr fhaighinn. Tha iad ag ràdh gun deach Saima Ahmad, a bha 36, fhaicinn air Tràigh Phortobello aig deireadh an Lùnastail an-uiridh. Chaidh a corp a lorg air iomall Dhùn Èideann còig mìosan às dèidh sin, agus chan eil fhios fhathast dè a dh'adhbharaich a bàs.

An SNP

Agus thèid iarraidh air Labhraiche Thaigh nan Cumantan an-diugh Pàrtaidh Nàiseanta na h-Alba ainmeachadh mar na Dùbhlannaich oifigeil aig Westminster. Canaidh Buill-Phàrlamaid Nàiseantach gu bheil cùl-taic aig a' cheannard acasan, Aonghas Robastan, na th' aig Jeremy Corbyn. Canaidh iad cuideachd gun deadh aca air a h-uile dreuchd a lìonadh sa chaibineat dùbhlannach, ao-coltach ri ceannard a' Phàrtaidh Làbaraich.