Brexit na "chothrom" dhan Ghàidhealtachd

Referendum

Thuirt fear de chomhairlichean na Gàidhealtachd gum bi buannachdan mòra ann dhan sgìre agus do Bhreatainn gu lèir nuair a dh'fhàgas an dùthaich an t-Aonadh Eòrpach.

Bhot an Rìoghachd 51.9% gu 48.1% gus an EU fhàgail.

Bha taic air a' Ghàidhealtachd, ge-tà, 56% gu 44%, 'son fuireach san aonadh.

Sin mar a bha e cuideachd anns na h-Eileanan an Iar le taic 55.2% gu 44.8% 'son ballrachd san EU.

Dragh

Nochd cuid dragh mar-thà mu bhuaidh Brexit air a' cheann a tuath.

Thuirt am BPA Gàidhealach, Ceit Fhoirbeis, gum faodadh a' Ghàidhealtachd is na h-Eileanan còrr is £100m a chall ri linn na bhòta.

Thuirt àrd oifigear Comhairle na Gàidhealtachd, Steve Barron, gum bi call cosnaidh an cois toradh na bhòta.

Thàinig beachd eile bho Alasdair MacFhionnghain, fear de chomhairlichean Inbhir Pheofharain is Shìophort.

"Cha robh mise toilichte leis an airgead a bha an Roinn Eòrpa a' toirt dhan Ghàidhealtachd", thuirt an Comh. MacFhionnghain.

"Bha na cosgaisean, a rèir is mar a bha iad ag obair, bha iad cus.

Duilgheadasan is cothroman

"Tha mi ag aideachadh gum bi duilgheadasan ann - ach bidh cothroman ann cuideachd", thuirt e.

Thuirt an Comh. MacFhionnghain gun robh e mothachail gun tàinig airgead Eòrpach gu leòr dhan Ghàidhealtachd, is gun do rinn e feum dha pròiseictean bun-structair gu sònraichte.

Thuirt e, ge-tà, gun robh cosgais a bharrachd ann dhan Rìoghachd a bhith san EU.

"Tha mise den bheachd gum faigh sinn an t-airgead sin agus gun cosg sinn e mar a bu chòir dhuinn anns a' Ghàidhealtachd", thuirt e.

Tuilleadh air an sgeulachd seo

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile