Rannsachadh mu thubaist phlèana

Tha rannsachadh air tòiseachadh feuch dè dh'adhbhraich tubaist phlèana faisg air an Òban Dimàirt.

Chaidh dithis a bha air bòrd a thoirt dhan ospadal.

Thàinig am plèana, a tha clàraichte sa Ghearmailt, a-nuas aig Loch nan Eala faisg air Meadarloch goirid ro 11:00m.

Bha am plèana dìreach air Muile fhàgail agus bha dùil rithe aig Port-adhair an Òbain airson connaidh mus rachadh i an uairsin a Bharraigh.

Bha boireannach is fireannach air bòrd.

Chaidh an toirt le heileacoptair dhan ospadal ann an Glaschu 's coltas ann nach eil iad ann an cunnart am beatha.

Tha luchd-rannsachaidh air tòiseachadh air an làrach a sgrùdadh feuch dè dh'adhbhraich an tubaist.