Oidhirp ùr gus dotairean a thàladh

Thèid £20,000 a thabhainn air dotairean gus a dhol a dh'obair ann an cuid de sgìrean dùtchail fo phlana ùr.

Dh'innis Riaghaltas na h-Alba gu bheil iad a' toirt sùil às ùr air obair dhotair teaghlaich.

Tha iad 'son barrachd dhotairean a bhrosnachadh a dhol nan dotairean teaghlaich

Tha draghan air nochdadh gum faodadh staing a bhith anns na bliadhnaichean ri teachd le gainnead de dhotairean teaghlaich.

Tha cuid de dh'ionadan slàinte air casg a chur air an àireamh de dh'euslaintich a tha iad a' gabhail is dragh ann nach eil àite ann 'son tuilleadh.

Thuirt an Riaghaltas gum bi cùmhnant ùr dha dotairean teaghlaich a bhios a' freagairt air feumalachdan slàinte san àm ri teachd.

Àiteachan trèanaidh

Chaidh 100 dreuchd trèanaidh ùr a shanasachd dha dotairean ùra.

Nam measg, tha 37 ann an àiteachan far an robh dreuchdan bàn 'son ùine.

Thèid bursaraidh £20,000 a thoirt dha dotairean a bheir seachad gealltanas gun gabh iad na dreuchdan.

Thuirt an Riaghaltas gu bheil iad a-nise air 439 dreuchd trèanaidh dha dotairean teaghlaich a shanasachd am-bliadhna.

Tha Bòrd Slàinte na Gàidhealtachd am measg an fheadhainn a tha a' faighinn tàire le dotairean a thàladh.

Tha iad air grunn iomairtean a chur air dòigh, nam measg oidhirp gus dotairean a thàladh às an Òlaind 'son a bhith ag obair air a' Ghàidhealtachd.

Dùinidh cothrom cur a-staigh 'son àiteachan trèanaidh an Riaghaltais air an 25mh den Lùnasdal.