Feum air "Plana B" an Ìle

An Hebridean Isles. Image copyright TheTurfBurner / Geograph

Dh'iarr feadhainn ann an Ìle gun stèidhich Caledonian Mac a' Bhruthainn plana sònraichte airson dèiligeadh ri trioblaidean aiseig san eilean.

Bha seirbheisean Ìle troimhe-chèile às dèidh dhan Hebridean Isles bualadh sa chidhe ann an Ceann na Creige.

Dh'fhàg sin nach robh ach am Finlaggan air an t-slighe eadar Ìle is Tìr-Mòr, ged a chuir CalMac bàta-bathair ann 'son faochadh a thoirt air an t-suidheachadh.

Bha luchd-gnothachais feargach.

Dh'iarr iad airgead-dìolaidh fhaighinn ri linn mar a thug an gnothach call orra.

Thill an Hebridean Isles gu seirbheis an t-seachdain seo, ged nach eil an clàr-ama air tilleadh dhan àbhaist fhathast

Tha sin fhèin na iomagain dha cuid san eilean.

Trang

"Seo an t-seachdain as trainge tron bhliadhna oir Diardaoin tha an fhèill ann", thuirt Sìne NicEalair, a tha a' fuireach ann an Ìle.

"Tha daoine a' tighinn nam mìltean dhan eilean an t-seachdain seo.

"Theirinn gu bheil na bùithean, na taighean-òsta, tha iad a' call mòran airgid", thuirt i.

Tha na h-Ìlich ag ràdh gu bheil feum air dòigh nas fheàrr air dèiligeadh ri trioblaidean den leithid.

Iarraidh iad a-nise air CalMac plana a stèidheachadh is coinneamh gu bhith ann an ceartuair,

"Bhiodh e feumail agus cuideachail nam biodh plana B aig CalMac, agus nach bi an suidheachadh seo ann a-rithist", thuirt Sìne NicEalair.

Tuilleadh air an sgeulachd seo

Duilleagan Eadar-lìn co-cheangailte

Chan eil uallach air a' BhBC son na tha air làraichean-lìn eile